الشيف الشربيني: هذا ما ينقص الطهاة في مصر
محمد جمال
وجه مألوف لربات المنازل، يحرصن منذ سنوات على متابعته ومشاهدة وصفاته، التي يحاول قدر المستطاع تجديدها وتغيير شكلها، بمهنته التي ورثها أبًا عن جد، حتى أصبح واحدًا من أهم وأشهر الطهاة العرب، هو الشيف الشربيني، صاحب أول برنامج طهي في مصر.
“إعلام دوت أورج” حاور الشيف الشربيني، الذي كشف فيه عن سبب شهرته، وكيف دخل عالم التلفزيون، وأيضًا عن إمكانية تقديمه برنامج طهي مع نجله الشيف علاء الشربيني، وإلى نص الحوار..
نرشح لك: من المطرية لـ السلام.. أين معقل نجوم المهرجانات؟
ما مدى صحة دخولك مجال الطهي بالوراثة؟
بالفعل اكتسبت أصول المهنة من الوالد والجد، وورثها حاليًا ابني الشيف علاء الشربيني.
ما الذي جعل الشيف الشربيني أكثر شهرة من غيره في مجال الطهي؟
الشهرة حاجة بتاعت ربنا، يمكن في أحسن مني كتير في المجال ده، كل حاجة بتطلع تلقائيًا، أنا حتى بكون داخل على الهوا مش عارف هعمل إيه، وكل حد فينا بيكون ليه لمسات.
كيف دخلت إلى عالم التلفزيون، وتحديدًا كبرى القنوات الخاصة؟
كنت بشتغل في التنشيط السياحي في أوروبا، ولما جيت “رمسيس هيلتون” كان بييجي عندنا عائشة البحراوي وأسامة الأتربي ويصوروا معايا في برنامج “حواء”، لحد ما فتحت قناة Nile TV واشتغلت فيها فترة قصيرة، وقضيت 7 سنين في قناة “الأسرة والطفل” بأول برنامج طبخ في مصر، وعملت برنامج 350 حلقة على قناة “المجد”، واشتغلت 5 سنين في قناة “الحياة”، والحمد لله حاليًا أنا اللي عامل CbC sofra طبخ 24 ساعة.
في وجهة نظرك، هل أثّر تقديمك للبرامج في خبرتك بمجال الطهي؟
الموضوع مش بس خبرة أو صنعة، ده موهبة من ربنا، وفيه تحديات ومواقف كتير ممكن تحصل على الهواء.
حدّثنا عن أكثر المواقف المحرجة التي تعرضت لها على الهواء؟
وأنا بشتغل عادي بصلي على النبي، كلمني مشاهد بيقولي ليه بتصلي على النبي كتير وأنت شغال؟، ياريت بلاش عشان إخواتنا المسيحيين ميزعلوش، ورغم إنّه موقف كوميدي لكنه بيوضح إنّ الجمهور بيركز في كل حاجة بنقولها ونعملها.
يتحدّث البعض عن احتمال مشاركة نجلك علاء تقديم برنامج تلفزيوني، ما مدى صحة هذا الكلام؟
غير صحيح، علاء له شعبيته وجمهوره وأنا كذلك، وكل واحد فينا بيخاطب فئة معينة.
كيف ترى تجربة مشاركتك في فيلم “قلب أمه”؟
كل ما الناس بتشوفني أكتر بيكون مكسب ليّا، سواء سينما أو تلفزيون أو دراما، وشاركت قبل كده مع الفنان أشرف عبد الباقي في مسلسل “عيلة زيزو”.
ما هي أكثر التجارب التي ترى أنّك لم توفق فيها؟
ربنا بيكرمني لأني بشتغل في الجزئية اللي بتقنها بس، يعني مش بشتغل في “الحلو” مع إني أعرف أعمله لكني مش “حلواني”، وبالتالي بركز أوي في اختيار التجارب اللي بشارك فيها.
من أبرز الطهاة الذين تفضلهم في مصر؟
مفيش حد أفضل من حد في مجال الطهي، كل واحد له أسلوبه ومميزاته.
من خلال تجربتك في أوروبا، ما الذي ينقص الطهاة في مصر؟
مناخ مصر مختلف عن أوروبا، لكن إحنا هنا في مصر بناخد ما تبقى من التصدير “خيرنا لغيرنا”، وطبيعة الشعب نفسه بتفرق لكن وضع الشيف مختلف، كنت في فرنسا وبنسمع نشرة الأخبار، قطعوها فجأة عشان يذيعوا نعي شيف، هنا زمان كان الواحد يخجل يقول إنّه طباخ.
ماذا تحضر لمتابعيك من مفاجآت جديدة في الفترة المقبلة؟
الأكل مش بيتجدد، لكن أنا بحدث شكل الطبق اللي بقدمه عشان يكون ليه ميزة مختلفة، لكن بالنسبة لتجارب القنوات إحنا حاليًا رقم واحد في مصر، عشان كده مفيش حاجة تخليني أغيّر لمكان تاني.
نقدم لك| شاهد: أين اختفى هؤلاء!!