سائق توك توك: مصر بقت بنت عم الصومال ! - E3lam.Com
لخص سائق توك توك حال الوضع في مصر، خلال تقرير مصور اجراه الإعلامي عمرو الليثي في برنامجه “واحد من الناس”، المذاع على قناة “الحياة الاولى”.
وقال المواطن: “دولة لها مؤسسات عسكرية وأمنية ووزارات، هل يعقل أن يكون وضعها بهذا الشكل؟ قبل ما يحصل الانتخابات لرئيس الجمهورية كان السكر والأرز في كل مكان، ما الذي حدث الآن؟”
مضيفا: “نتفرج على التليفزيون نلاقي مصر فيينا، لكن ننزل الشارع نلاقيها بنت عم الصومال”.
واستنكر المواطن احتفالية البرلمان في شرم الشيخ التي تكلفت ملايين، قائلا: “بيحتفلوا بـ 38 وفد يصرفوا عليهم 25 مليون والمواطن مش لاقي ياكل، ده ربنا هيجيبهم يوم القيامة يسألهم لمن الملك اليوم؟”.
و سأل الليثى هذا الشاب: “انت خريج ايه؟” .. فأجاب: “أنا خريج توك توك سيبني أكمل.”
وانفعل المواطن قائلا: “تعليم وصحة وزراعة، لو المواطن لقاهم محدش هيقدر عليه، حرام مصر يتعمل فيها كده، بالله عليك إزاي وصل الحال بينا كده، بعد ما كنا أكبر احتياطي نقدي في العالم، مصر اللى كانت مسلفة بريطانيا ، يجي دلوقت حبة دول من الخليج تتريق علينا؟ إيه اللى حصل.”
و تسأل: “هل هذا يليق بمصر، و مكانة مصر مفيش حد قلبه على مصر و بيحب مصر يقول لا حرام ميرضيش ربنا ، شوية تجار ضحكوا على الناس بحجة الوطنية، والديموقراطية، والعدالة الاجتماعية، و عهودهم بعيدة كل البعد عن العدالة” .