مؤمن المحمدي يكتب: بالمناسبة (29) حواديت أسوان

إنت عارف إن أسوان كان فاضل لها تكة، وتشارك في بطولات أفريقية؟

الحكاية دي حصلت موسم 1990/ 1991، لما أسوان قابل الأهلي في نهائي الكاس، بس إحنا كسبنا 1/ صفر بالعافية. مع إن ده كان أول موسم نشوف فيه أسوان، لـ إن ده كان أول موسم تصعد فيه للممتاز، والأغرب بقى إن أسوان هبطت في نهاية الموسم، لأ دي مش هبطت بس، دي كانت آخر الجدول، وما كسبتش طول الموسم، اللي كان 34 ماتش، غير ماتشين اتنين بـ العدد (يعني كسبت في الكاس ضعف اللي كسبته في الدوري)

اللي منع أسوان ساعتها من إنها تروح أفريقيا مش إنها اتغلبت مننا في النهائي، اللي منعها إن الأهلي سنتها ما كسبش الدوري، مع إن الأهلي كان أول الدوري، بس الموسم ده كان أول موسم ما يعتمدوش فيه على فرق الأهداف في تحديد بطل الدوري، فـ لما اتساوينا مع الإسماعيلي، لعبنا ماتش فاصل، وخسرنا 2/ صفر، والماتش اتلعب على ستاد غزل المحلة.

لو كان الأهلي كسب الدوري، كان راح أبطال الدوري، واللي شارك في الكاس أسوان بـ اعتباره وصيف الكاس.

الغريب بقى في لقاءات الأهلي وأسوان إنهم ما اتعادلوش أبدا قبل كده، وكل الماتشات اللي اتلعبت بينهم، انتهت بـ فوز الأهلي، ما عدا ماتش واحد كسبته أسوان، وكان في استاد القاهرة، موسم 1997/ 1998، ومش 1/ صفر، لأ، 2/ صفر.

الماتش ده كان الماتش الوحيد اللي الأهلي خسره سنتها، مش بس كده، ده إحنا ما خسرناش بقية ماتشات الموسم، ولا الموسم اللي بعده كله، ولا الدور الأول من الموسم اللي بعد بعده، كنا ساعتها تحت إدارة تسوبيل، والأهرام حبت توجب مع الراجل، فـ عملت له غلاف، إنه عامل زي هتلر، وسفاح الأندية وكده، فـ راحت السفارة الألمانية بعتت له استدعا، وحققوا معاه، ليه الناس دول بـ يشبهوك بـ هتلر.

ولـ إن الشيء بـ الشيء يذكر، حكاية هتلر دي ياما عملت لنا مشاكل، وهاني رمزي أول ما راح يحترف في ألمانيا، وراح جاب جون، قال لك أحيي الجماهير بـ طريقة مختلفة، وراح عامل بـ إيده إشارة الرايخ التالت: هايل هتلر، وطبعا وقفوه، وعملوا معاه تحقيقات، لـ حد ما عرفوا إنه واحد متوسط التعليم جي من مصر، كل اللي يعرفه عن ألمانيا إنها بلد هتلر.

نرجع لـ أسوان اللي دايما بـ تقدم نتايج عجيبة، ومواسم غريبة، يعني في موسم 1998/ 1999، أسوان عملت الدور التاني من أحسن ما يكون، ولو الدور التاني ده دوري لـ وحده، فـ أسوان تطلع التاني بعد الأهلي، ومع ذلك أسوان هبطت، لـ إنها طول الدور الأول مكنتش جمعت أربعة بنط على بعض.

سنتها كان اللي بـ يدرب أسوان في الدور التاني محمد عامر، اللي اكتشف لاعب عندهم كانوا راكنينه اسمه إسحق أول، وإسحق ده كسر الدنيا الدور التاني، وطلع الهداف، وكان طبيعي بعد هبوط أسوان إنهم يبيعوا اللاعب ده، وكان طبيعي أكتر إن اللي يشتريه هو الأهلي.

اللاعب ده من أكتر الاعيبة اللي اتظلمت في الأهلي، أول ما جه، كان آخر موسم لـ تسوبيل، ركنه طول الموسم، والموسم اللي بعده جبنا مدير فني اسمه ديكسي، قرر يلاعبه باك يمين!

الموسم اللي بعده جه مانويل جوزيه أول مرة، والراجل إن اللي عاجبه في كل لاعيبة الأهلي سمير كمونة وإسحق أول، وإنه هـ يجهزهم لـ الموسم الجديد، سمير كمونة اتوقف سنة، وإسحق أول في أول تمرينة جاله رباط صليبي، وما شفنهوش تاني

إييييه دونيا