ابنة مديرة مدرسة "كفر الجزار": المدرسة طول عمرها مفيهاش فلوس!
كشفت سمر عبد الله، ابنة صالحة عبد الفضيل، مديرة مدرسة "كفر الجزار"، كواليس ما يحدث في المدرسة، وذلك بعد تصدر والدتها التريند بسبب واقعة محافظ القليوبية مع مديري المدارس خلال جولته التفقدية قبل يومين.
قالت "عبد الله" خلال مكالمة هاتفية مع الإعلامي رامي رضوان في برنامج "من ماسبيرو" المذاع عبر شاشة القناة الأولى المصرية: "المدرسة طول عمرها مفيهاش فلوس.. المدرسين كانوا بياخدوا الفكة اللي فاضلة من المرتبات ويجيبوا بيها الحاجات الناقصة وورق للكنترول".
تابعت: "مفيش ولي أمر بيدفع حاجة.. السنة اللي فاتت بس قالوا للطلاب في امتحانات آخر السنة هاتوا ورق فلوسكاب بـ 2 جنيه".
أضافت: "فأولياء الأمور عملوا مظاهرات وإزاي ابني ياخد 2 جنيه غير المصروف؟ احنا قرية فقيرة.. فالمدرسين بقوا هما اللي يجيبوا".
أشارت: "المحافظ راح السنة اللي فاتت لقى حيطان المبنى والسلالم مشروخة.. فهدوا المبنى وسابوه".
أردفت: "المبنى القديم ده كان فيه الحمامات والكهرباء وكل حاجة.. ماما قالت للمدرسين احنا بناخد فلوس آخر الشهر فنحللها.. قالوا لها وهي دي حياة آدمية؟ لا في مروحة شغالة في عز الحر، ولا في حمام حتى ندخله".
أكملت: "ماما اتصلت بالحداد وعملت البوابة على حسابها.. لما بنتجمع عندها كنا بنقولها يا ماما ليه الفلوس دي كلها!".