خضر محمد خضر: قوة قهرية سبب طلاقي أنا وياسمين أبو النجا

نشر المخرج خضر محمد خضر منشورًا مطولًا عبر حسابه على "فيس بوك" كشف خلاله عن تفاصيل من حياته الشخصية مع الراحلة ياسمين أبو النجا، ورد فيه على الانتقادات التي طالتهما مؤخرًا، مطالبًا الجمهور بالتوقف عن تداول الشائعات واحترام خصوصيات الأسرة.

قال "خضر" عبر حسابه الرسمي على موقع "فيس بوك"،: "على فكرة أنا بعرف أرد كويس وبعرف أحكي كويس.. يعني أنا مستعد أحكيلكم عادي عن أسرار بيوتنا اللي ماحدش يعرفها غير المقربين مننا".

أضاف: "وممكن أحكيلكم عن علاقتي الزوجية أنا وياسمين من بعد ما خلفنا ومن ساعة ما دكاترة فرنسا حذرونا من الحمل مرة تاني، وممكن أحكيلكم عن بداية النهاية من سبتمبر 2024 بعد 18 سنة جواز". 

استكمل: "وممكن أحكيلكم مين أجبرني أنا وياسمين على الطلاق بالعافية وإيه السبب وليه ياسمين ماعرفتش تقف قدام القوة القهرية دي، وممكن أحكيلكم مين أجبرها تسيب البيت 4 أشهر وماترجعش غير لما نتطلق وبقيت أنا عايش لوحدي 4 أشهر في بيتنا وبنتي عايشة 4 أشهر مع أمي وهي عايشة 4 اشهر اجباري في بيت تالت". 

أشار: "وممكن أحكيلكم أنا وياسمين كنا بنتقابل في الشارع اللي ورا بيتهم في السر ازاي عشان ترجع البيت وفشلنا برضو، بسبب القوة القهرية دي، وممكن أحكيلكم عن صداقتي أنا وياسمين وعلاقتنا بعد الطلاق لما رجعت بيتنا وأنا مشيت وقعدت جنب أمي عشان كانت بتتعالج من السرطان، وممكن أحكيلكم عن مكالماتنا أنا وياسمين ورسايلنا كل يوم وزياراتنا كل اسبوع". 

أوضح: "وممكن أحكيلكم أنا ليه اتجوزت بعد الانفصال بـ 13 شهر وعملت فرح بالرغم من إن مراتي ماكانش فارق معاها نعمل فرح، وياسمين كانت على علم وزين بنتي حضرت الفرح بدون أي مشاكل أو نفسيات".

تابع: "مراتي اللي أنتم نازلين فيها تجريح وتقطيع بدون ذنب.. زي ما نزلتوا تجريح في ياسمين بدون ذنب لما طلعت معايا في مهرجان الجونة وسخرتوا منها عشان ماكانش عاجبكم شكلها واتريقتوا عليها ودمرتولها نفسيتها لمجرد إنها مش شبه أمها، لدرجة إنها حلفت ماتطلعش في مهرجانات تاني من ساعتها، ولا نسيتم.. كومنتاتكم وجرحكم ليها وسخريتكم منها وألفاظكم النبيلة لسة موجودة على الفيسبوك على فكرة". 

كشف: "وممكن أحكيلكم مين اللي ضحك على ياسمين ووالدتها وأقنعهم إنها تعمل قسطرة تكميلية في المستشفى بتاعتها، بدل الجراحة التكميلية اللي الدكتور الإسباني رفض يعملها عشان مايحصلش مضاعفات واحتمال وفاة، وحذرها من القسطرة وأنا وزين حذرناها وللأسف عملتها من ورا ضهرنا".

أردف: "ممكن أحكيلكم على كل حاجة كل اللي نفسكم تعرفوه.. بس بشرط كل واحد فيكم يحكيلنا الأول عن أسرار بيته والخبايا اللي ماحدش ينفع يعرفها وعلاقتكم كأسرة وعلاقتكم كأزواج ومين عمل إيه بالتفصيل ومين راح فين وعلاقتكم الصحية ومشاكلكم النفسية وأسماء الدكاترة اللي بيعالجوكم والأدوية اللي بتاخدوها ومين طلق مين وليه ومين اتجوز مين وليه وامتى". 

تابع: "اللي مستعد يحكي أسرار بيته بالتفصيل على الملء أنا هحكيله أسرار بيوتنا بالتفصيل.. يا إما خليكم في حالكم وسيبوا الناس في حالها..احنا لا علينا دين لحد ولا مطالبين نحكي أسرارنا لحد، ومن يوم طلاقنا وأنا تحولت من زوج ياسمين لأخوها الثالث مش طليقها، وتحولت ياسمين من زوجتي لأختي التانية مش طليقتي." 

اختتم: "غلاوتها في قلبي هتفضل زي غلاوة ندى أختي لآخر يوم في عمري.. ادعوا لياسمين بالرحمة والمغفرة وادعوا لبنتها ولأهلها بالصبر والقوة، وياريت كفاية تريندات وقرف وسيبونا في حالنا بجد".