بعد هروبه من بعثة المنتخب.. زياد أبو جبل: عملت كده عشان ابقى راجل في نظر نفسي!
كشف زياد أبو جبل لاعب منتخب مصر للمصارعة الحرة للشباب تفاصيل أزمته الأخيرة بعد هروبه من بعتة المنتخب في سلوفاكيا، وذلك بعد مشاركته في بطولة العالم للشباب.
كتب "أبو جبل" عبر حسابه الرسمي على "فيس بوك": "أنا اللاعب الدولي زياد حجاج أبو جبل لاعب منتخب مصر للمصارعة الحرة.. أنا عايز أقول لأبويا وأمي ما تزعلوش مني".
تابع: "أنا عملت كده علشان ابقى في نظر نفسي راجل، ومش هرجع مصر بلدي الحبيبة إلا وأنا مشرفها، سامحوني، أنا تعبت كتير وتعبت أبويا اوي معايا، أنا كلفته كتير وهو معاه سبع أخوات غيري، ومكنش ينفع غير أني أرجع مصر ومعايا الميدالية وإن شاء الله هيحصل".
أضاف: "حبيت أطمنكم عليا، وإن شاء الله راجع لمصر وانا بطل ومشرفها.. بالله عليك يا حاج تسامحني وتدعيلي، وأنا حبيت اقول لكل اللي ظلمني وظلم أبويا وأخواتي، أنا سفروني لوحدي من مطار القاهرة إلى سلوفاكيا ومحدش معايا من البعثة، ومكنش في دماغي حاجة".
أكمل: "اتصلت بيهم وروحت على البطولة ولعبت وأنا كنت مصاب في الضلع اليمين وأصريت ألعب عشان أحقق حلمي وأجيب ميدالية لمصر..
أنا كل اللي باخده في الشهر 700 جنيه وأنا لاعب دولي، هيعملوا إيه ولا إيه؟ لكن أنا المسئول عن القرار ده بعد الضغوط دي كلها مكنش ينفع أرجع تاني.. أنا اتولدت مصارع وهعيش مصارع، رفعت علم مصر وهيفضل مرفوع إن شاء الله، سامحوني.. ابن مصر زياد حجاج أبو جبل".