بيومي فؤاد: أحمد السبكي شايف محدش المفروض ياخد فلوس غير محمود الخطيب!
كشف الفنان بيومي فؤاد عن كواليس تعاونه مع المنتج أحمد السبكي، مؤكدا أنه الأخير معروف بكرمه الشديد لكن له أسلوبه الخاص في تسليم دفعات الأجر، مستشهدًا بمواقف طريفة جمعتهما داخل مواقع تصوير أبرز الأعمال.
قال "فؤاد" في حواره مع برنامج "رايح ولا جاي" على "راديو 9090"، والذي يقدمه الإعلامي رامي الحلواني والإعلامية سالي سعيد،: "أحمد السبكي معروف عنه (أنت حبيبي طول ما أنت ما بتطلبش فلوس).. مرة قُلت للسبكي أنا عاوز 40 ألف جنيه قال لي بتوع إيه؟ قلت له بتوع أي حاجة، قال بكره، ودايما يقول بكرة وينفذ".
أضاف: "قلت له أنا عاوزهم دلوقتي.. معايا 30 ألف وعاوز 40 ألف كمان عشان أقبض الناس.. النهارده 5 في الشهر قال لي افتح الخزنة فتحت الخزنة لقيتها فاضية فيها ورق بس، وبعدين لقيت درج رفيع فيه باكو 200 جديدة خدتهم، قالي: والله ما أعرف عنهم حاجة، وبعدين لقيت شنطة فيها 10 آلاف، وخدتهم ومن طيبته، خدتهم بره الحساب".
أشار: "هو كريم جدا فوق الوصف بس عنده مشكلة أنه شايف محدش المفروض ياخد فلوس في مصر غير (محمود الخطيب).. كل ما حد مننا يتكلم ويطلب أجره يقول له أنت فاكر نفسك (الخطيب)؟، وأوقات كتير بيتفرض عليه الناس من النجوم".
أوضح: "أول ما اتصاحبنا كنت بعمل فيلم (جوازة ميري)، فقلت له: أنت!.. أنا عاوز كرفان فبص لي، وقال: أنت بتكلمني أنا يلا؟ قلت له آه أنا عاوز كرفان، قال هو أنت في حد عارفك؟.. أنا كنت لسه في بداياتي بس عملت مسلسل (الكبير) قلت له أنا كل الناس عرفاني فجاب ولد من النادي وقال له تعرف ده؟ قال له الدكتور ربيع قال له اسمه إيه؟ قال له بيومي قال له هات كرفان".