محمد حماقي عن والده: كان ذكي جدا في تربيته لينا
استعاد الفنان محمد حماقي ذكرياته مع والده، متحدثًا عن طبيعة علاقته به وطريقة تربيته له ولشقيقه طارق، كما كشف عن أسلوب والده في المعاملة والعقاب، وكيف انعكس ذلك على علاقتهما.
قال "حماقي" خلال لقائه بموقع "بيلبورد عربية": "أنا مفتقده، وأكيد شهادتي فيه هتبقى مجروحة، كل واحد بيشوف أبوه أعظم حد بس حتى بشهادة كل الناس اللي اتعاملوا معاه قالوا إنه كان إنسان مش عادي".
أضاف: "كان طيب وحنين جدا، وذكي جدا في تربيته لينا، وفي معاملته معايا أنا وأخويا طارق.. مفتكرش في مرة زعلت منه، حتى لما كنت ببقى غلطان ويعاقبني، عقابه ماكنش بيزعلني.. كان دايما بيختار طريقة تعلم أكتر ما تزعل".
استكمل: "مفتكرش إني حسيت في يوم إن أبويا كان قاسي عليا، حسيت دايما إنه خايف عليا، ومحستش إنه إنسان عنده سلطة عليا وبيستخدمها، ومكنش بيجبرني على شيء".
اختتم: "كان متفهم جدا وبيسمع قوي، حتى وأنا بقول حاجة بالنسبة له ممكن تكون تافهة وأنا صغير، كان بيسمعها باهتمام، فبقى جوايا ثقة.. كان طيب قوي وحنين جدا".