18 تصريحا لـ خالد حماد أبرزها عن عادل إمام ونور الشريف
أدلى الموسيقار خالد حماد، بعدة تصريحات خلال لقائه ببرنامج "من إمبارح للنهارده" الذي تقدمه الإعلامية همسة إمام على ميجا إف إم.
وجاءت أبرز تصريحاته كالآتي:
1- أكتر فيلم بفتكر تحضيراته كان فيلم "معالي الوزير"، مع العبقري أحمد زكي، وكان فيلم مركب ومش سهل.
2- اشتغلت مسلسل "أوان الورد" وكنت لسه ما اتخرجتش، وكنت محظوظ جدا لما اتكلفت إني أعمل الموسيقى التصويرية بتكليف من المخرج سمير سيف والكاتب وحيد حامد وكنت مخضوض!
3- أول فرصة عمل ليا في الموسيقى التصويرية كان فيلم "ضحك ولعب وجد وحب" سنة ١٩٩٣، واللي إداني الفرصة كان أستاذ عمرو عرفة، وكنت في أولى جامعة واخدت عليه جائزة تشجيعية.
4- أخدت جائزة عن فيلم "بيت الروبي"، وكنت سعيد بيها جدا.
5- مهنتنا صعبة وقاسية طول الوقت، ودايما ما بيكونش في اتساق بين اللي بعمله وبين اللي عايشه، وبحاول أتقمص وأدخل في الحالة المطلوبة وأبعد عن أي ظروف شخصية عندي.
6- والدي كان بيحب الفن، ووالدتي كمان كانت بتهتم بالفن واكتشاف الموهبة، وهي اللي شجعتني إني أدرس في الكونسرفتوار.
7- طفولتي كانت صعبة وكنت واخد الدنيا جد، عشان كده كنت بفضل الشغل من صغري عن إني أروح المصيف.
8- كنت محظوظ بشغلي مع نور الشريف وعادل إمام.
9- اتعرفت على عادل امام في بلجيكا لما كنت بعمل موسيقى "شورت وفانلة وكاب"، ومن حظي إنه اتعمل عيد ميلادي مع الفنان عادل إمام مرة في فرنسا،
ومرة مع الفنان نور الشريف.
10- بحب أسمع جدا الفنانة ريهام عبدالحكيم، وسعيد إنى اشتغلت معاها وبتمنى لها التوفيق دايما.
11- دراستي للإخراج بشكل منفصل عن الموسيقى خلتني أحط نفسي مكان المخرج وطلباته، وساعدتني جدا في مهنة التأليف الموسيقي للصورة والدراما.
12- كنت برتاح جدا في شغلي مع المخرج سعيد حامد وهو شخص خفيف على القلب وارتحت كمان مع مروان حامد ورامي إمام.
13- مهنتنا لا تتحمل ناس مش شاطرة، ومعظم اللي موجود فيها شاطرين وعندهم موهبة.
14- نور النبوي فنان جميل وروحه خفيفة واتبسطت بشغلي معاه في مسلسل "إمبراطورية ميم".
15- اشتغلت مع المخرج أحمد مدحت وبحب أشتغل معاه جدا لأنه مجتهد جدا وبيشتغل بقلبه وبشغف.
16- عملت حفلة في الأوبرا من أكتر من سنتين، وبجهز إنى أعملها تاني قريب جدا.
17- محتاجين نحافظ على تراثنا القديم ونعيد مشاهدة الأفلام الأبيض والأسود من جديد.
18- اهتماماتي غريبة من صغري، وكنت بحب أقرأ المعلومات العلمية جدا وبعشق الأفلام التسجيلية العلمية والسير الذاتية.
