بعد وفاة سهام جلال.. رانيا محمود ياسين: لما راح المقبرة بقى حتة سكرة!
تحدثت الفنانة رانيا محمود ياسين عن وفاة الفنانة سهام جلال، وما أُعيد تداوله من تصريحات سابقة لها تحدثت خلالها عن ابتعادها عن العمل الفني لفترة طويلة، وكشفها أنها تواصلت مع أحد النجوم معاتبةً إياه لعدم مساعدتها في العودة إلى الساحة الفنية.
كتبت "ياسين" عبر حسابها الرسمي على موقع التواصل الاجتماعي وتبادل الصور والفيديوهات "إنستجرام": "الله يرحم سهام جلال ويغفر لها ويثبتها عند السؤال، للأسف مكنتش أعرفها شخصيًا بس كنت بحبها".
تابعت: "ياريت الاهتمام ده كان يبقى وهي عايشة، لكن للأسف الدنيا كده، لما راح المقبرة بقى حتة سكرة.. اللي عايزة أقوله إن الشغلانة دي مفيش فيها حاجه اسمها أصحاب والله ولا في أي شغلانة، هي الحكاية كفاءات أو محسوبيات، وفي مهنتنا بالتحديد كل ما تبقى لسه جديد وفريش تبقى مطلوب أكثر".
أشارت: "محدش يلوم على نجوم ويقول إنهم خذلوا اللي بيطلب منهم شغل، لأن النجم أحيانًا بيبقى مش لاقي حاجة مناسبه للي طالب منه العمل معاه، كمان النجوم بيغيروا أرقامهم كثير من وقت للتاني، ممكن تطلبوا على رقم غلط وتتصور إنه تجاهلك، وأحيانًا تانية بيبقى مشغول جدًا في تحضير العمل اللي متباع باسمه، وبيبقى مش فاضي يرصد كل رقم كلمه أو رساله جاتله".
أكملت: "بلاش دايمًا نشيطن النجوم كل ما حد من الزملاء يتوفاه الله قهرًا ونقول زملائه سبب، هي أصلًا مش بتاعتهم تشغيل حد، والحقيقة في صعوبة شديدة في الميديا، وناس كتير قاعدين في البيت والشغلانة حقيقي ملهاش كتالوج، لا بتبقى عارف ده ليه بيشتغل؟ ولا بتبقى عارف ده ليه مش بيشتغل؟ وإزاي ده قاعد في البيت بالرغم من شطارته وتميزه, وغيره معندوش موهبة أصلًا وشغال نار، هي صراحة ملهاش كتالوج.. رحم الله سهام جلال وأسكنها جنات النعيم، نسألكم الدعاء لها".