أول رد من عزيز الشافعي على انتقادات تعاونه الأخير مع شيرين
رد الملحن والشاعر الغنائي عزيز الشافعي على الانتقادات الموجهة له بعد تعاونه الأخير مع شيرين عبد الوهاب ومحمد حماقي في أغنية "بحرية"، مشيرًا إلى أنها حملة ممنهجة بهدف اغتياله معنويًا والقضاء على نجاحه.
نشر "الشافعي" مقطع فيديو عبر حسابه الرسمي على موقع التواصل الاجتماعي "فيس بوك" قال فيه: "الحملة دي بدأت مع عودة شيرين عبد الوهاب في أغنية (الحضن شوك) اللي نجحت بعد كده وبقت رقم 1".
تابع: "بعد كده عملنا (تباعًا تباعًا) وبرضه بدأت حملة شديدة في أول 3 أيام.. تريقة وسخرية من استخدام اللغة العربية والمفعول المطلق وحاجات كتير ضحكتني.. لكن نجاحها سكت الناس اللي بتهاجم عودة شيرين مع عزيز الشافعي".
أشار: "أغنية (بحرية) بان فيها اوي إن في قصد واضح لاغتيالي معنويًا والقضاء على النجاح المستمر.. أنا بدافع عن نفسي كواحد معملش حاجة، عمل أغنية بس، واحد بقاله 20 سنة بيحاول يخلق مشروع فني وقدر ينجح ووصل لمكانة الناس كلها عارفينها ويبدو إن بعض لناس مستكترينها".
أضاف: "الفيديو ده للناس اللي بحبهم.. عيلتي وأولادي وبناتي وكل الناس اللي حواليا واتأثروا وزعلوا إن عزيز الشافعي بيتقال عليه كلام بالقسوة دي.. المحامي بتاعي قرر ياخد إجراءات قانونية لبعض الإساءات، وأنا مش عايز ده لكن لازم يحصل لإن في كلام فيه سب وقذف وازدراء، لكن أنا نبهت عليه يفرق بين النقد والرأي والإساءة اللفظية".
أكمل: "أنا سعيد بنجاح الأغاني ومسامح الناس في الهجوم اللي بعد كده اتقلب لحب.. لكن مش مسامح اللي بيعملوا حملة ممنهجة عشان يأذوني، هما فعلا أذوني نفسيًا.. وبشكر شيرين وبقولها اوعي تزعلي، وأنتي اليومين اللي فاتوا كنتي أنتي اللي بتبعتيلي وبتقوليلي متزعلش، لكن أنا اللي بقولك متزعليش ومبروك عليكي النجاح".