ياسمين صبري: أستحق الأفضل.. والناس الحشرية اختارت الطريق الغلط

تحدثت الفنانة ياسمين صبري عن حياتها الشخصية ونظرة الجمهور لها، مؤكدة أنها لا تهتم بالشائعات أو محاولات التدخل في خصوصياتها.

قالت ياسمين صبري خلال لقاء مع ET بالعربي، إن بعض الأشخاص يرهقون أنفسهم في متابعة حياة الآخرين، مضيفة: "في النهاية أنا ماشية في طريقي ومبسوطة بيه، وهو الشخص اللي اختار يتعب نفسه ويفكر في حد تاني، اختيار خاطئ من وجهة نظري".

وعن تتبعها باستمرار، وما يتم تداوله حول ارتباطها أو وجود أشخاص مقربين في حياتها، أكدت أنها ترى مثل تلك الأحاديث عادية وطبيعية ولا تنزعج منها، وتتمنى للناس أن يختاروا الأفضل في حياتهم بدلًا من تتبعها.

كما وجهت رسالة للفتيات اللاتي يشعرن بالإحباط عند مشاهدة حياة المشاهير عبر السوشال ميديا، قائلة: "المفروض الإنسان لما بيشوف وفرة أو نجاح عند شخص تاني يقول ما شاء الله، يعني إذا هو قدر أكيد أنا كمان أقدر.. ما هي ما كانتش دايمًا معايا، كانت عند ناس تانية فجتلي، ومش هتفضل دايمًا معايا".

أضافت: "ممكن الدنيا حظوظ بس الحظوظ في حاجات كتير قوي، وحسب بقى كل واحد شايف حظه ازاي أو نظرته للحياة، الحياة بسيطة مش محتاجة الإنسان يتعب نفسه قوي كده، ولو فيه بنت بتشوف في التلفزيون أو السوشال ميديا حد ناجح وواصل وحياته لذيذة، إحنا برضو مش بنظهر التعب".

أكدت ياسمين أن شخصيتها قائمة على فكرة الاستحقاق، موضحة: "أنا استحقاقي عالي، وأؤمن إني أستحق الأفضل والأحسن والأجمل"، مشيرة إلى أن الحفاظ على صحتها النفسية والعقلية والجسدية كان من أهم أسباب نجاحها، مردفة: "فكرة كلمة "أنا أستحق" هي عمود من عواميد شخصيتي وروحي وكياني، أنا فعلًا أستحق الأفضل، الأحسن، الأجمل، أستحق كل حاجة.. ده عندي من زمان، لكن ما كنتش عارفة هكون فين وازاي.. كل اللي عملته إني سعيت إني أحافظ على نفسي وعقلي وروحي وعلى قلبي وجسدي، وكل حاجة فيا، بحيث أقدر أكون أستاهل الاستحقاق ده".

كما تحدثت عن تأثيرها على الفتيات والسيدات، خاصة فيما يتعلق بالقوة والاستقلالية، مؤكدة أنها سعيدة بهذا التأثير حتى لو لم تكن تدرك حجمه بالكامل.

وفي سياق آخر، أشادت ياسمين بحملة "ست البيت" التي شاركت فيها مع L'Oréal Paris، معتبرة أن دور ربة المنزل من أصعب وأهم الأدوار في المجتمع، لأنه مسؤول عن تربية أجيال كاملة وصناعة المستقبل.