"لم يرتبط مشواري بدور واحد".. 19 تصريحا لـ فتحي عبد الوهاب
تحدث الفنان فتحي عبد الوهاب عن كواليس مشواره الفني ورؤيته للحياة والفن، كاشفًا عن تفاصيل شخصية وفكرية خلال استضافته في برنامج "سهرة نغم"، الذي يقدمه الإعلامي محمد بكر عبر إذاعة "نغم إف إم".
وجاءت تصريحاته على النحو التالي:
1- مفيش دور فني في مشواري كان بيغيّر حياتي أو يعمل فيها تحول في المسار، وده شيء إيجابي من وجهة نظري، إني ما أكونش مرتبط بعمل معين قد ما مرتبط بتراكم أعمالي واتساع دايرة تأثيرها.
2- فكرة الدور اللي بيعمل نقلة في حياة صاحبه دي فكرة ما أحبش تحصل معايا، لأن النقلة اللي بتيجي من دور معين ممكن تستنزف كل اللي جواك، وتحولك للعبة في إيد الصناعة، أو يتم توظيف موهبتك بشكل تجاري.
3- عملت مسرحية "هاملت" سنة 2004 في المسرح القومي، لكن لو كنت عملت الدور ده بدري عن ميعاده كانت هتبقى شيلة تقيلة عليّ، لأن مهم الفنان يكتسب الخبرة الكافية قبل ما ياخد الدور المهم.
4- لما حد بيقولي إنت بتعمل شخصيات مركبة، ببقى عايز أقوله مفيش شخصية معقدة وشخصية بسيطة.. وأي شخصية في الدنيا ليها طبقات وأكتر من مستوى، والطبقات دي بتتشكل من الطفولة، وشغلي كممثل إني أنقّب وأبحث في الطبقات دي وأقدمها بدون تعسف.
5- وأنا صغير كانت أحلامي طفولية جدًا، زي إني ما أصحاش بدري وأروح المدرسة، وبعد كده بشوية كان عندي حلم الطيران، وده يمكن بسبب تأثري بالكارتون وبرامج الأطفال، ولما كبرت شوية حلمت أكون طيار.
6- وأنا في نفسي كنت مش عارف أنا مين ورايح فين، ودي مرحلة صعبة، لكن الخروج منها بعد تفكير وتأمل بيوصل الإنسان إنه يعرف هو عايز إيه وإيه خطته اللي جاية.
7- فيه نوعين من العبث اللي بيحيط بالكوكب.. عبث بنحصره في التسلية وكلام السوشيال ميديا في معظمه، وعبث تاني متعلق بالصراعات والحروب والظلم الإنساني، وبواجه العبث بالتواجد في أجواء بحبها مع الناس المقربين.
8- بحب الزراعة جدًا، وعندي أرض في سيوة، وروح الناس هناك طيبة ومسالمين، والغالب الأعم منهم بعيد عن الصراعات اللي بنشوفها.
9- بحكم إن جدي لأمي كان من القليوبية من طوخ، كنت بروح هناك في الصيف، وكنت قريب من المزارع والغيطان، وده اللي زرع فيا حب الخضرة والمياه وهي بتسقي الأرض، وحب الزراعة عمومًا.
10- أول مرة أزور سيوة كانت في 2006، والبلد دي فيها حاجة غريبة، وهناك النداهة ندهتني، وبقيت أروح كل سنة، وخدت حتة أرض في 2014 وبنيت عليها بيت صغير.
11- بمر في سيوة بحالة من الهدوء النفسي والوجداني، وحتى لما بكون مشغول هناك بكون مشغول بحاجة بحبها زي مراقبة الشجر وهو بيكبر، والاستمتاع بتأمل الورق الأخضر، وحاجات على قد ما هي بسيطة على قد ما بتصفي القلب والروح.
12- أصف نفسي بأني بحاول أكون إنسان جيد وصالح.
13- تعريف الحب بالنسبة لي هو إنك تبقى شايف نفسك ومحققها في حبك، وده اللي بيديك شحنة من الأمل طول الوقت.
14- في المراهقة اتعلمت ألخص كل تفاصيل العالم في عيون شخص، والإحساس بإن القلب هيخرج من ضلوعه من كتر الحب.
15- فيه تفاصيل في قصص الحب ما بتتنسيش، حتى لو القصص دي ما كملتش، ولغة الحب المفضلة ليا هي الأكل.
16- النصيحة اللي معلقة في ودني من والدي إني ما أخافش طول ما أنا معتقد في اللي أنا بعمله وشايف مشاعري حقيقية.
17- نصايح أمي ليا كانت بشكل عملي مش بالكلام، واتعلمت منها جبر خواطر الناس.
18- ورثت من أبويا الثبات على الرأي مش التعصب، لأني ممكن أغير رأيي كل 3 دقايق، بس طول ما مفيش حاجة تستدعي أغيره مش بغيره، وورثت من أمي مزيج من العصبية والحنية.
19- السلام النفسي مش حاجة سهلة إن الإنسان يوصل لها، لكن فيه مواقف علمتني السلام، زي وقت بداياتي الفنية لما صادفتني صدمة مهنية كبيرة، والصدمة دي بعد فترة اتعلمت منها إن ربنا ممكن يبعت لك مشكلة تعلمك تفهم الحياة أكتر، والدرس المستفاد إن مفيش حاجة تستاهل تؤذي سلامي النفسي مهما كانت.