كريم قاسم: بخاف من السوشيال ميديا!
تحدث الفنان كريم قاسم عن سبب قلة ظهوره الإعلامي، مشيرًا إلى أنه يحب انتقاء البرامج التي سيظهر فيها، لأنه يفضل إبقاء حياته الشخصية بعيدًا عن الأضواء.
وفيما يلي أبرز تصريحاته خلال لقائه في برنامج من "امبارح للنهاردة" مع المذيعة همسة إمام عبر "ميجا إف إم":
- بحب أنقي البرامج اللي بطلع فيها، وبتوتر جدًا لأني بحب أحافظ على سرية شخصيتي.
- كلامي بيتاخد كتير برا السياق كتصريحات، عشان كده بقيت حذر وبخاف من السوشيال ميديا.
- كنت محظوظ إني اشتغلت مع مخرجين موهوبين زي حسين المنباوي وطارق العريان وأبو بكر شوقي.
- بحب أذاكر أدواري جدًا، وبكون منجذب للشخصية عشان أعرف أشتغل عليها وبكون متعاطف مع كل الشخصيات مهما كانت.
- لما عملت فيلم "هيبتا" كنت قربت أكره الشخصية من كتر ما كنت عايز أطلعها واقعية وحقيقية، وكان شخص توكسيك.
- اتعلمت من والدي كتير عن الفن وعن الإخراج والعدسات، وشغله كمدير إنتاج للأفلام الأجنبية علمني كتير لأني نزلت معاه مواقع التصوير.
- كان حلمي إني أكون لاعب كرة أو ممثل، وبعد مادخلت كلية هندسة حسيت إني بضحك على نفسي.
- أول مرة تمثيل ليا كان في فيلم "أوقات فراغ"، ومثلت أول شوط في حياتي قدام الفنانة سلوى محمد علي، وكنت متوتر جدًا.
- الفترة الزمنية في مسلسل "مناعة" عجبتني أوي، ونفسي أعمل أدوار في الزمن ده تاني.
- أتمنى إن فيلم "القصص" ينزل قريب في السينما.
- بحب الطبيعة جدًا وبلدنا من أجمل البلاد في العالم، وبحب استمتع بالهدوء.
- مشاركتي في مهرجان الأقصر بلجنة التحكيم كانت تجربة هايلة، وحبيت المهرجان جدًا واتعلمت كتير من الأستاذ محمود حميدة.
- مش بحب أعادي حد وأنا شخص مش بتاع خناقات، وقربت جدًا لأحمد داوود وزوجته.
- بحب أسمع رأي أحمد داوود في شغلي وبلجأ لأمير المصري في حياتي الشخصية وعلاقاتي.
- أنا شخص بيتوتي وبدور إنى أكون أسرة مع شخصية مناسبة ليا، وكل فترة متطلباتي في شريكة حياتي بتتغير.
- بيني انا وأحمد داوود كيمياء في الشغل ودايمًا قلبنا على بعض.