أحمد زعيم: كنت دائم التوتر وتعلمت التفاؤل بقربي من الله
تحدث المطرب والملحن أحمد زعيم عن أغنيته "بدعي عليك"، مشيرًا إلى أنه غناها عام 2018 ولكنها ظهرت مؤخرًا بعد إعادة توزيعها، لافتًا إلى أهم ما تعلمه خلال مسيرته الفنية.
قال "زعيم" خلال لقائه مع برنامج "سهرة نغم"، مع المذيع محمد بكر على "نغم إف إم": "بدأت حياتي محاسب، ووالدتي كانت بتحاول تقنعني أسيب الفن، وأركز في أكل عيشي عشان خايفة عليا".
تابع: "والدتي توفت قبل شهرتي، لما كان عندي تخت موسيقي بسيط في دمنهور، ووالدي كانت دايرة علاقاته موظفين، ومكنش فاهم إزاي ممكن أفتح بيتي من المزيكا، لأنه واخد على فكرة الشغل وقبض المرتب آخر الشهر".
أشار: "كل خوف وقلق والدي راحوا لما شاف خطوات نجاحي، وبقى فرحان بيا جدًا.. ورثت مزيج من الصفات من والدي اللي كان موظف، وبيصحى بدري وينزل يسعى عشان أكل عيشه، وأمي اللي كانت ربة منزل بسيطة وحياتها هادية، وأخدت منهم خفة الدم وحب النكت".
أكمل: "من أهم نصايح والدي إني أعيش اللحظة، وما أشغلش بالي باللي فات ولا اللي جاي، وغرس فيا مقولة (ما بين طرفة عين وانتباهتها يغير الله من حالٍ لحال)".
أضاف: "أغنيتي الجديدة (بدعي عليك) ليها قصة غريبة معايا، اتكتبت واتغنت في 2018، بس ظهرت مؤخرًا بعد إعادة توزيعها من خماسي لمقسوم، ومنزلتش وقتها لأن مودها وفكرتها كانت مختلفة عن طبيعة الألبوم اللي نزل وقتها.. وفكرتها غريبة، لأن نادرًا لما راجل بيدعي على حبيبته، في حين إن الدعاء على الحبيب أمر أنثوي، بس أنا كنت حاسسها جدًا ومؤمن بالحالة والفكرة، والحمد لله وصلت للناس".
تابع: "على مدار مشواري الفني حصل تطور كبير، من شغلي كملحن بيجرب ألحان، وبجرب صوتي على الألحان اللي بيغنيها غيري، ومع كل استايل غنوة ولحن بحس إن فيه تغير في صوتي، وده حصل مثلًا في أغنيتين (يا عراف) و(حب تاني)، وفضلت أشتغل على صوتي وركزت لحد ما بقى له شخصية واضحة ومميزة".
تابع: "بعتبر نفسي شخصية حرة، لا تحب أن يقودها أحد، أو يفرض عليها أي قرار، وفي المقابل أنا شخص بطيء في قراراته حاليًا بعد أن أخذت دروس كثيرة من التسرع زمان.. أكتر وقت حسيت فيه بالوحدة بعد وفاة أمي، ومش بحب الوحدة بطبعي، لكن من وقت للتاني الإنسان بيحتاج للعزلة والهدوء لإعادة ترتيب أوراقه".
أشار: "كنت دائم التوتر والقلق زمان بطبعي، لحد ما اتعلمت التفاؤل مع الوقت بقربي من ربنا، وإيماني بقدره خيره وشره، وبدون إيمان مفيش طمأنينة، وأي إنسان لازم يعود نفسه على التفاؤل لحد ما قدره يتغير للأحسن".