دنيا سامي: أشرف زكي غير لي حياتي!
تحدثت الفنانة دنيا سامي عن دور الفنان أشرف زكي، نقيب المهن التمثيلية، في التحاقها بمعهد الفنون المسرحية، مشيرة إلى أن هذه الخطوة غيرت حياتها بالكامل.
قالت "سامي" خلال لقائها مع المذيعة خلود نادر في برنامج "أكتر حاجة" عبر إذاعة "راديو النيل": "أكتر حاجة بتفرحني إني أكون متطمنة على أهلي وبالي مرتاح، وأكتر حاجة بحب أسمعها إن حد يدعي لي".
تابعت: "أكتر حاجة نفسي أبطلها هي العصبية الزايدة، وأكتر عادة مبسوطة بيها حب الخير للناس.. وأكتر حاجة بتضايق منها في التعامل هي سوء الظن".
أضافت: "أكتر قرار أخدته وأنا مبسوطة وأنا بقفل علاقات إنسانية كانت أذياني، وأكتر حاجة بحبها في شغلي النتيجة".
أكملت: "أكتر دعاء ماما بتدعيهولي وبحبه أوي: (ربنا يحبب فيكي حصى الأرض)، وأكتر مشروب بحبه في رمضان البلح باللبن".
أشارت: "الدكتور أشرف زكي فضل ورايا لغاية ما دخلت معهد الفنون المسرحية، وده غيرلي حياتي تمامًا.. وبحب الأفلام القديمة أوي، ومؤخرًا بقيت أحب أسمع أغاني قديمة أوي".
تابعت: "أنا مش بطبخ، ومبحبش المطبخ خالص.. وأكتر بلد بحبها بعد مصر المغرب، أول ما خرجت من المطار حسيت بسحر جميل.. وأكتر حاجة بخاف منها عندي فوبيا من الغدر".