محمد علي رزق: تواصلت مع أطباء نفسيين بسبب "على قد الحب"!
تحدث الفنان محمد علي رزق عن شخصية الطبيب النفسي التي يقدمها ضمن أحداث مسلسل "على قد الحب" مع الفنانة نيللي كريم، مشيرًا إلى استعانته بأطباء نفسيين ليتمكن من الاستعداد للدور.
قال "رزق" خلال مكالمة هاتفية مع المذيعة ليلى بدران في "برنامج رمضان نايتس" عبر إذاعة "راديو هيتس": "قعدت أذاكر حبة حلوين وقعدت مع أكتر من دكتور نفسي بحيث معملش حاجة كليشيه، مش عايز أعمل حاجة متعارف عليها، قولت عايز أبقى شبه الموضوع جدًا".
تابع: "من الحاجات اللي نفعتني جدًا إنهم قالولي لازم طول الوقت تكون إنسان محايد، مينفعش تتعاطف مع المريض ولا تديله حلول، ممكن نقعد ندور على الحلول سوا، بس لازم تطلع منه هو، فده ساعدني وأنا بذاكر أني لما بلاقي جملة مش شبه الكلام ده أروح أتناقش فيها مع أستاذ خالد سعيد المخرج وأقوله عادةً بيحصل كذا".
نرشح لك: من بين الجنسيات الأجنبية محمد جمال مصري يجسد دور مستوطن بـ "صحاب الأرض"
أضاف: "اكتشفت حاجة جمية جدًا كان خالد عاملها بصراحة، روحت لقيته جايبلي دكتورة نفسية في اللوكيشن، وكنت كل لما أروح أتناقش في حاجة تقولهم اه هو صح أنت شاطر ومذاكر".
أشار: "دي أول مرة أشتغل مع نيللي كريم، هي من ألذ الناس اللي ممكن تتعاملي معاها على المستوى الإنساني، إنسانة جميلة ولذيذة وبشوشة جدًا، بتحب شغلها بشكل فظيع، ومتحسيش إنك أول مرة تتعاملي معاها، هي قادرة تشيل الحاجز ده بحيث تدخل اللي بيمثل قصادها وهو مرتاح
لسه مستمرين في التصوير".
وفي سياق آخر، تحدث الفنان محمد علي رزق عن دوره في مسلسل "درش" موضحًا: "شخصية (هلال) اللي بقدمه في مسلسل (درش) الناس شايفاه إنه ما عندوش شخصية وإنه بيمشي ورا مراته، لكنه في الحقيقة بيحب مراته جدًا وبيحاول يرضيها طول ما أفكارها مناسبة له".
تابع: "دي مش أول مرة أشتغل مع مصطفى شعبان، وهو إنسان جميل ورايق طول الوقت، ومش بيحب المشاكل، وبيحب الضحك والهزار في اللوكيشن عشان اليوم يعدي وكل الناس مبسوطة".