شاب بنها: لولا الفيديو مكنتش أخدت حقي!
كشف إسلام أو المعروف بـ "شاب بنها" تفاصيل واقعة الاعتداء عليه وإجباره على ارتداء ملابس نسائية والوقوف بها في الشارع وتصويره لإهانته أمام الجميع.
قال شاب بنها خلال لقائه مع برنامج "صباح العربية": "أنا جيت من برا لقيت والدها قاعد فوق مع أخواتها وخالها وبيسألني ليه عملت كده؟ قولتله عملت إيه؟ أنا معملتش حاجة، فقامت خناقة ورفعوا عليا سكينة أنا وأهلي، وشدوني على السلم.. بقيت أعافر وأمسك في السلم ومبقتش قادر عليهم".
تابع: "بعد ما شتموني وأخدوني في العربية أخدوني هناك واتهنت، أنا اتهنت واتداس بالجزمة على وشي، وبعدها عملوا حاجات مش كويسة.. الفيديو ده ربنا سخره عشان يقف جنبي، أنا ما أذتش حد ودايمًا في حالي".
أشار: "أنا مكنتش في وعيي أصلًا للي أنا بعمله ده.. ماشي معاهم ومستستلم ومش عارف إزاي كنت ماشي كده.. بعد الضرب ولما أهانوني قولتلهم أنا هموت وأشرب مياه من الضرب وبعدها مشوفتش إيه اللي حصلي.. الله أعلم حاطنلي فيها حاجة ولا لا، بعدها كنت ماشي مستسلم، امشي كده حاضر ويضربوني، لا كنت عارف أجري ولا بعافر معاهم.. كنت خايف على أهلي اوي".
أكمل: "الأول صوروني فيديو وقالولي هنولع في بيتك لو معملتش اللي احنا هنقولك عليه وهنموتلك أبوك".
أردف: "أنا اترفضت مرتين.. المرتين اللي اتقدمت فيهم اترفضت فيهم، ومفيش حد اتعاطف معايا ولا قالي هجوزهالك.. أنا مخطفتهاش، احنا نزلنا قعدنا على كافيه في بنها، كلمتها على إنستجرام الساعة 4 ونص 5 ونزلت قابلتها في كافيه".
تابع: "كنا بنتفق أني هصورها يوم شبكتها بس من جوايا كنت زعلان وهي زعلانة، وهي صارحتني وقالتلي أنا بحبك بقالي سنة ونص، قولتلها أنا كمان كنت حاسس بنفس الشعور، وقالتلي أنا مش عايزة خطيبي لأنه كبير في السن ومش عايزة أروح البيت تاني
قالتلي مش هرجع تاني، لو مش هتيجي معايا امشي دلوقتي وسيبني لوحدي.. وبعدين أخدتها وسافرنا إسكندرية وكل ده كان بكيفها.. ولما أختي اتصلت قولتلها تعالي خديها وروحيها لأهلها".