لمدة 6 أشهر.. أمل رزق تروي تفاصيل فقدان بصرها المؤقت

تحدثت الفنانة أمل رزق عن كثير من الأزمات التي مرت بها في حياتها، مشيرة إلى أنها فقدت بصرها فجأة بشكل مؤقت خلال عودتها من تصوير مسلسل "الطبال"، واستمرت هذه الحالة لمدة 6 أشهر دون تشخيص طبي دقيق، مؤكدةً أنها كانت تعاني من ضغط نفسي وعصبي كبير.

قالت "رزق" خلال حوارها مع الإعلامية يمنى بدراوي في حلقة مساء الخميس من برنامج "ورقة بيضا" المذاع عبر شاشة "النهار"، إنها كانت تمر بحالة نفسية سيئة للغاية قبل مشاركتها في مسلسل "آدم"، وكانت أيضًا مجهدة للغاية خاصة وقت تصوير مشاهدها في مسلسل "الطبال".

أوضحت: "في مرة ضغطت نفسي وكان في مجهود وضغط عصبي وإسماعيل كتكت -والد بناتها- كان بيعمل عملية زرع كلى وكنا في المستشفى.. ومحدش كان مقدر، وأنا كنت موجوعة جدا، والفترة دي كانت قبل مسلسل (آدم)".

أضافت: "روحت التصوير، وأنا راجعة لقيتني شايفة العربية بتطلع على الرصيف والشجر جاي على عينيا، ووقفت وطلبتهم في البيت قولت لهم: أنا مش شايفة، وكنت متخيلة إني هروح أهدأ وهرجع، لكن فضلت شايفة الحاجات فوق بعضها، روحت لدكتور نظر وأنف وأذن وحنجرة وقالوا مفيش حاجة، ودكتور مخ وأعصاب قالي لازم تاخدي كورتيزون تحسبا، وقعدت فترة شايفة بياض بس".

أضافت: "كنت بشتغل في مسلسل (الطبال) وحصله مشكلة مادية تاني يوم إصابتي بالحالة دي واتوقف 6 شهور، وبعدها ما بقتش شايفة خالص، ومحدش فاهم إيه ده، وإن احتمال ماشوفش فترة، بس اللي طمن الدكتور إني كنت شايفة بياض مش سواد".

أشارت: "بعد 6 شهور دخل رمضان وفي يوم كنت بعيط وبقول لربنا: اديني فرصة أحج.. كان نفسي أحج ومش عاوزة حاجة من الدنيا تاني.. قمت الصبح بفتح عيني، لقيتني شايفة الباب، والدكتور قالي: حالتك دي تُدرس.. وحجيت في نفس السنة".