تفاصيل مشهد القسطرة لـ محمد الدمراوي في "لا ترد ولا تستبدل"
كشف الفنان محمد الدمراوي تفاصيل ظهوره في مسلسل "لا ترد ولا تستبدل" خلال أحداث الحلقة الأولى والتي قدم فيها مشهد تركيب قسطرة الغسيل الكلوي.
نشر "الدمراوي" مقطع فيديو عبر حسابه الرسمي على موقع التواصل الاجتماعي وتبادل الصور والفيديوهات "إنستجرام" قال فيه: "معاكم محمد الدمراوي، استشاري تخدير ورعاية مركزة جراحية وممثل، واللي منكم شاف مسلسل "لا ترد ولا تستبدل" الحلقة الأولى مشهد تركيب قسطرة الغسيل الكلوي.. أحب أقوله إني كنت أنا الممثل اللي نال الشرف وقام بالدور ده".
تابع: "الطب زي التمثيل، الاتنين بيهتموا بالتفاصيل، تفصيلة صغيرة مش مظبوطة بيتبني عليها حاجات كتير مش مظبوطة، سواء في دور بيتعمل أو علاج مريض، والمشهد ده مجاش صدفة، جه نتيجة اهتمام كبير من المخرجة مريم أبو عوف".
أكمل: "بالذات لما عرفت أني دكتور تخدير فحبت أعمل تفاصيل تركيب (الماهوكر) زي ما بنعمله لأي مريض فشل كلوي، والحمد لله المشهد طلع بواقعية وبإتقان، ولأول مرة تقريبًا إجراء طبي يطلع بالدقة دي، مع التحفظ على بعض التفاصيل طبعًا، والحمد لله المشهد لقى استحسان خصوصًا في الأوساط الطبية".
أضاف: "ولأني كممثل بحب أقدم مشهد صادق، أحب كمان كطبيب أقدم نصيحة تغير وتأثر في الناس.. الناس اللي بتاخد مسكنات عمال على بطال، واللي ماشيين بكيس كتافست في جيوبهم وشريط بروفين في شنطتهم، وأي وجع ياخدوا مسكن، أرجوكم، المسكنات مبتتاخدش عمال على بطال وبشكل عشوائي، المسكنات مبتتاخدش غير تحت إشراف طبي".
أردف: "أرجوكم اللي عنده ألم أو جسمه بيديله أي إشارة أن في حاجة مش مظبوطة، يروح يكشف ويعالج المرض المتسبب في الألم، مش يعالج الألم.. المسكناش مش وحشة، بس معمولة عشان تتاخد بداعي معين وبجرعة وقدرة معينة لكل جسم".
أشار: "الأيام دي شتاء وبننسى نشرب مياه، أرجوكم منبه بسيط على الموبايل كل ساعة عشان نشرب مياه، مش هنخسر حاجة بالعكس هيفيدنا ومش هيفيد الكلى بس لكن الجسم كله".
مسلسل "لا ترد ولا تستبدل" بطولة الفنانة دينا الشربيني والفنان أحمد السعدني وصدقي صخر ويارا جبران وحسن مالك وفدوى عابد وحنان سليمان، من تأليف دينا نجم وسمر عبد الناصر، وإخراج مريم أبو عوف.