بسبب شروط المدارس الخاصة.. محمد علي خير: "هو أنا بقدم لابني في وكالة ناسا!"

توجه الإعلامي محمد علي خير برسالة لمحمد عبد اللطيف، وزير التربية والتعليم والتعليم الفني، حول شروط القبول بالمدارس الخاصة، مناشدًا إياه بوضع قوانين إلزامية تمنع هذه الشروط.

قال "خير" خلال برنامجه "المصري أفندي" المذاع عبر قناة "الشمس 2": "القاضي في محاكمة رمضان صبحي ناشد وزير التربية والتعليم وقاله مينفعش ده كده تمييز، من حق ولي الأمر حتى لو كان أميًا أي لا يقرأ ولا يكتب إن ابنه يتعلم في أي مدرسة هو عايزها".

تابع: "وزير التربية والتعليم قال لا يوجد في قوانين الوزارة شروط بأن الأب لازم يكون صاحب مؤهل عالي، بس أكيد معالي الوزير عارف أن ده بيحصل".

أضاف: "تعالى نقول للأستاذ محمد عبد اللطيف، وزير التربية والتعليم، بعض الوقائع اللي خدناها من الأصدقاء وأهالينا اللي بيقدموا للمدارس، مثلًا، في مدارس بترفض قبول الطلاب حتى هذه اللحظة بسبب مؤهل الأب، أو عدم حصول الأب أو الأم على مؤهل عالي.. هو أنا لو أبويا وأمي معهومش مؤهل عالي، هل أنا كده أتحرم من التعليم؟ دي رسالة للسيد وزير التربية والتعليم".

أشار: "في مدارس بترفض قبول التلاميذ بسبب انفصال الأب عن الأم، وأنت مالك كمدير مدرسة؟ هتيجي المدرسة تقولك مش عايزة أدخل في موضوع الولاية.. في مدارس بترفض تلاميذ بسبب مهنة الأب، معاه مؤهل عالي بس المهنة غير لائقة مثلًا، شغال على تاكسي مثلًا".

أكمل: "وفي مدارس بترفض الأب والأم لو أحدهما لا يُجيد لغة أجنبية، وفي مدارس بتشترط أن الطفل اللي عمره 5 سنين يبقى ملم بإحدى اللغات الأجنبية، وفي مدارس لازم تشوف كارنيه النادي والحساب البنكي.. هل ده يعقل؟ مش كل الحاجات دي بتتعارض مع الدستور".

أردف: "نقدر نفي الوزارة طبعًا وأرجو من المحترم الأستاذ محمد عبد اللطيف، وزير التربية والتعليم الإفادة والرد على الحاجات اللي ذكرناها، هيقولي إن الوزارة لا تضع مثل هذه الشروط، بس ده في المدارس الحكومية وأنا هنا بتكلم على المدارس الخاصة.. هو أنا جاي أعلم ابني ولا بدخله وكالة ناسا للفضاء!".