إنجي كيوان تودع عام 2025 بكلمات مؤثرة

ودعت الفنانة إنجي كيوان، عام 2025 بكلمات مؤثرة، عَبرت من خلالها عما مرت به من تغييرات طوال هذا العام، مؤكدة على أنها ستستقبل العام الجديد بشخصية حرية وحضور وقوة.

كتبت "كيوان" عبر حسابها الرسمي على موقع "إنستجرام": "كل سنة لما أبص على ذكريات السنة اللي فاتت، بحس بالرضا وببقى فخورة إني عرفت أوازن بين شغلي وحياتي، وأعيش وأستمتع وفي نفس الوقت أحقق اللي نفسي فيه".

تابعت: "السنة دي كانت مختلفة.. اشتغلت كتير، ركزت، وكبرت من جوه بطرق مش دايمًا باينة للناس، وده شيء أفتخر بيه، بس في نفس الوقت كنت لوحدي أغلب الوقت، ومع الوقت حسّيت إن في حاجة ناقصة.. إحساس بالحرية، مش نقص واضح، بس إحساس هادي كده بييجي لما الحياة تبقى شغل ومسؤوليات أكتر من إنها عيشة".

أضافت: "السنة دي علمتني إن النجاح من غير ناس حوالينا بيبقى ناقص، وإن الالتزام من غير فرح ممكن يبقى تقيل على القلب. وفكرتني إن التوازن مش حاجة نوصلها وخلاص، ده اختيار بنعمله كل يوم.. ممتنة لكل الدروس، ولكل القوة، ولكل خطوة كبرتني.. بس مش داخلة السنة الجديدة شايلة الوحدة ولا الثِقل ده معايا".

اختتمت: "السنة الجاية بختار حرية أكتر، حضور أكتر، ضحك أكتر، ولحظات أحس فيها إني عايشة بجد.. بختار حياة مش بس شكلها حلو، لكن إحساسها حلو كمان".