محمد علي خير: ليه سعر المدفن يوصل لـ 7 مليون؟
تحدث الإعلامي محمد علي خير عن أزمة المدافن في مصر وارتفاع أسعارها، طارحًا العديد من التساؤلات حول ثقافة امتلاك كل أسرة لمدفن خاص بها.
قال "خير" خلال برنامجه "المصري أفندي" المذاع عبر قناة "الشمس 2": "كلامي ده رايح لجميع محافظي مصر ولوزارة السكان ولهيئة المجتمعات العمرانية، أنا بتكلم بالعقل وبالراحة وبالمنطق".
تابع: "كنا زمان نقول إن 97% من أراضي مصر صحراء، احنا عمرناها ووصلنا لـ 15%، يعني عندنا 85% من أراض مصر فاضية، هل ينفع وأنا عندي كل الكتل الصحراوية دي يبقى عندي أزمة مدافن؟ ده أول سؤال بالعقل".
أكمل: "الحاجة التانية، ما هو المدفن؟ هل المدفن محتاج توصيل مرافق؟ صرف صحي مثلًا أو وصلات مياه.. أي أسرة في الدنيا هتقولك أديني 20 متر، أفهم أن في أزمة قاتلة في بعض محافظات الدلتا، الغربية مثلًا كلها أراضي زراعة ومفيش مساحة، فتطلع فتوى أن احنا نقدر نعمل دور تاني مدافن، لكن في القاهرة الكبرى والوادي الجديد والإسماعيلية، إزاي يبقى في أزمة؟".
أضاف: "إزاي في مصر يوصل سعر مدفن 5 و6 و7 مليون؟ ليه؟ إيه الحكمة من ثقافة أن كل أسرة تمتلك مدفن؟ احنا عايزين نغير الثقافة دي في بلدنا، طب ليه مش هتتغير؟ لأن دي سبوبة للشركات اللي بتدخل فيها والسماسرة واللي يبنوا والإدارة المحلية، ما هو مصدر دخل للمحافظة برضه، المحافظة بتبيع لك المدفن رسمي بـ 130 ألف".