رئيس شعبة المعادن الثمينة يحذر من شراء الفضة!
توجه إيهاب واصف، رئيس شعبة الذهب والمعادن الثمينة والتعدين باتحاد الصناعات، بنصائح للمواطنين حول شراء الذهب والفضة خاصةً بعد ارتفاع أسعارها في الفترة الأخيرة محذرًا منها.
قال "واصف" خلال مداخلة هاتفية مع الإعلامي مح علي خير في برنامج "المصري أفندي" المذاع عبر شاشة "الشمس 2": "هرجع ليناير 1980 يمكن مش ناس كتير تعرف المعلومة دي وصلت الفضة لـ 49.85 دولار، كان في الأخوين هانت كانوا حاطين استثمارات كبيرة جدًا لشراء الفضة في ذاك الوقت، وكان في تلاعب معهم كبير في الفضة أدى إلى تدافع الناس أو المستثمرين في البورصات العالمية أنهم يشتروا الفضة".
تابع: "وبالتالي حققوا أرباح كبيرة جدًا من وراء أنهم اشتروا كميات كبيرة للفضة في العقود الآجلة، وبرضه التضخم كان مرتفع زي ما بنشوفه في الفترة دي من بعد أيام كورونا".
أشار: "لما اكتشفت المؤامرة اللي كانوا بيلعبوها وقتها كان طبيعي يحصل انهيار في أسعار الفضة ووصلت في نفس السنة إلى 7 دولار.. نرجع إلى النهاردة وما يحدث في الفضة.. ممكن من القصة دي نستشف نقط جوهرية في احتمال تكون بتحصل دلوقتي، ما يحدث الآن هو توجيه عالمي للاستثمار في الفضة، وبنلاقي بعدا دولة زي الصين بتحط طلب كبير على الفضة بيبلغ تقريبًا على لحد معلوماتي 14 ألف طن للفضة، وهو يعتبر مخزون مثلما سُمي أنه مخزون صناعي وليس استراتيجي أول للبنك المركزي هناك".
أوضح: "أنا بخاف من الفضة رغم أنها مهنتي ومهنة جدي وهي أساسنا، لكن بخاف من التلاعب في أسعار الفضة، ودايما بيبقى عندي حذر شديد منها نتيجة ما حدث في 1980.. الارتفاعات الكبيرة احنا متفقين عليها اقتصاديًا لازم توصل لنقطة ويحصل من وراها أرباح"
أكمل: "في الذهب دايمًا بقول للناس كل الأوقات مناسبة للشراء طالما الشراء بتاعنا استثماري على المدى الطويل، النهاردة واصل لنقطة تخوف ودي بصفتي الشخصية مش الرسمية، المواطن المصري الاقتصادي اللي شايف الرؤية قدامه، أنا شايف أنه حتى لو حصل زيادات كبيرة تانية في أسعار الفضة ولكن هيكون الانكسار بتاعها سريع ولازم هيحصل".
أردف: "وضع الدهب يختلف عن الفضة، لأننا عارفين أسباب ارتفاعات أسعاره اللي بتكون واضحة وصريحة أمامنا جميعًا.. أنا عادةً مبحبش أقول توقعات لكن بنك (جولدمان ساكس) بيتوقع إن الدهب يوصل عند حدود 4900 للأوقية وهي حاليًا 4338 كان إغلاق يوم الجمعة، وبنوك أخرى بتقول إنه ممكن يكسر الـ 5000".