هيدي كرم: القرار الغلط نعمة كبيرة اوي!
تحدثت الفنانة هيدي كرم عن أهمية القرارات الخاطئة التي يتخذها الفرد في حياته، وأن هذه القرارات هي من تجعله يتعرف بشكلٍ أفضل على نفسه واحتياجاته.
نشرت "كرم" مقطع فيديو عبر حسابها الرسمي على موقع التواصل الاجتماعي وتبادل الصور والفيديوهات "إنستجرام" قالت فيه: "كلنا بنغلط وبناخد قرارات غلط زي قرار الهجرة لبلد تانية، لبلد متقدمة ومتحضرة وبتدي فلوس للناس وسكن وبتعلم الناس ببلاش.. حلم أمريكا، حلم كندا، حلم أستراليا".
تابعت: "فباخد القرار وباخد عيلتي وولادي وبهاجر وبكتشف في النص أن ده قرار غلط وأني مش سعيد وعايز أرجع لبلدي لكن أكابر عشان مبانش غلطان.. أخد قرار غلط أني أغير شغلي وأروح شغل تاني وبعدين أكتشف أني مش حابب الشغل ده خالص ومش لاقي نفسي فيه، كنت مبسوط في شغلي القديم، بس لا مش هقول كده عشان مبانش غلطن".
أكملت: "أخش علاقة تطلع غلط ومش مناسبة بس مش همشي منها ومش هفرح الناس فيا، أنا هكمل وأعافر لمجرد أن الإيجو بتاعي بيقولي مينفعش أبان غلطان قدام الناس".
أضافت: "مدرس التاريخ بتاعي كان بيقول لي مش غلط أنك تغلط، لكن كل الغلط أنك تكمل فيه وتكابر.. لما ناخد قرار غلط في حياتنا القرار الغلط ده نعمة كبيرة اوي لأنه بيعلمنا حاجات كتير عن نفسنا وعن اللي عايزينه ومش عايزينه في حياتنا، فاوعى تفكر أو تحاول متغلطش، لأنك كده مش هتعيش ومش هتقدر تاخد أي قرارات لأنك خايف تغلط والأنا الداخلية بتاعتك تقولك مش هنعترف بغلطنا أبدًا".
أشارت: "استفدت إيه؟ سنين من عمرك بتضيع، سعادة وفرص تانية بتضيع، كله بيضيع وأنت الوحيد الخسران الاعتراف بالخطأ قوة كبيرة.. اوعوا تندموا، الندم شر كبير بيخلي البني آدم واقف محله مبيتحركش.. اللي بيحبك بجد هيفرح أنك عرفت في الآخر أنت عايز إيه، واللي مبيحبكش كده كده هيشمت فيك".