بعد خسارة الزمالك من الأهلي.. عمرو أديب: الدوري ضاع!

انتقد الإعلامي عمرو أديب أداء نادي الزمالك خلال المباراة التي جمعته اليوم بالنادي الأهلي ضمن منافسات الدوري المصري، مشيرًا إلى أنهم أضاعوا فرصة تاريخية لن تعوض.

قال "أديب" خلال حلقة مساء الاثنين من برنامج "الحكاية" المذاع عبر شاشة "mbc مصر"، إن الأهلي يستحق الفوز بنقاط أعلى، مشيرًا: "الحظ النهارده كان مع الزمالك وعمل له كل حاجة، والزمالك (رفسه) هو ده الأهلي التعبان والمهدد بالهبوط ولاعيبته تعبانة؟!".

نرشح لك: أحمد حسن: كانافارو مرشح لتدريب الأهلي

أضاف أن لاعيبي الزمالك لم يكن لديهم ثقة بالنفس على عكس فريق النادي الأهلي الذي يثق في نجاحه وتقدمه، واصفًا إياهم بـ"الشياطين الحمر".

أشار: "الماتش مش قد كده، بس الأهلي في أي لحظة كان هيجيب 3 و4، لكن الزمالك ما لعبش (بنكلة) وضيع فرصة تاريخية، فجأة بقى كل دورك أنك تطفش الكُرة وتلعبها بعيد.. ليه فكرة الهزيمة مسيطرة على دماغنا؟!".

أوضح عمرو أديب: "الزمالك لاعيبته عظيمة وموهوبة، والأهلي نص لاعيبته (متعورين) ومنزل لاعيبة بقالها شهور وسنين ما بتلعبش، أومال لو إمام عاشور موجود وزيزو موجود! ده في لاعيبة ماشيه، والمدرب الموجود مؤقت! وفي الآخر الزمالك ما يكسبش! نعمل ايه تاني؟!".

أردف "أديب": "اليوم أعلن لكم ضياع الدوري للزمالك.. كده الدوري خلص، حتى لو ما أخدوش الأهلي مش هياخدوا الزمالك.. كل سنة نفس المأساة والمصيبة والتنقيط، وهي كسرة كل سنة، ومش فاهم إيه الحكاية؟!".

كما تطرق للحديث عن بكاء مشجع الزمالك بسبب الخسارة، قائلًا: "ده لو حد من عيلته راح، مكنش هيبقى بيعيط كده، بس ده لأنه شاف اللعب، والطموح بقى في السماء، وفجأة ينقلب الأمر وتتغير النتيجة، لكن للأسف يا زمالك طلعت خايب ومتأخر وغير قادر".

أكد: "لن تجد أهلاويا مندهشا من النتيجة، كلهم كانوا عارفين النتيجة، وده شيء محزن، وأنا اتضايقت عشان كنت بشجع وعندي أمل كبير، بس أمل ماتت وخدوا عزاها".

اختتم: "أنا حظي الغريب إني ولا مرة كنت إجازة من الهواء أو عندي ظروف ومش موجود أو طلعت بعد الماتش بساعات! دايما أنا أول واحد باخد العزاء، أنا مُختار عشان الماتش دي تخصصي، وجايز بعد عمر العيال يقعدوا مكاني، عشان أبوهم وصاهم: ابقى يابني اتنكد بعد ما أموت".