عبد المنعم حسين يكتب: سبق صحفي مع أبو الكباتن "بلبل حيطة"
الكابتن بلبل حيطة أهم ركائز ودعائم فريق "سِبرتو أف سبورت SFS "، وهو مصنف من أحسن مليون لاعب تحت خط الفقر الكروي، حسب تقرير الفيفا الأخير، ذلك نظرًا لمساهمته في صعود فريقه للدوري الممتاز، لعدم مشاركته مع الفريق بسبب إصابته طوال الموسم أثناء إحدى مباريات دوري السجون.
اكتسب "بلبل" أهميته من كونه أول لاعب يحرز هدف ويفشل في تسجيله أثناء الإعادة فيخسر فريقه المباراة.. وقد ارتفعت أسهمه، ورفض التجديد لناديه بعد أن علم بإنه سيلعب "للأهلي" مقابل 1000 جنيه وساندوتش "فاهيتا فراخ"، وعلم بهذا الحلم نادي "الزمالك" فعرض عليه 2 مليون جنيه وكرتونة بيض، مما أشعل المنافسة فزاد عرض الأهلي إلى 30 مليون وقفص مانجو زبدية، مما أثار تحفظ وكيل أعماله وهو صاحب البقالة بقريته، الذي يسعى لبيعه لتسديد ما عليه من جرارة الشكك، فطالب وكيل أعماله أن يكون قفص المانجو فونس، ولكن أبو الكباتن مازال يماطل لأنه ينتظر عقد خارجي من خارج الوسط الرياضي.
لهذا كان لنا معه هذا اللقاء التليفزيوني بإحدى القنوات الفضائية، وكان لنا السبق في تسجيله:
(حديقة فيلا يتوسطها الكابتن بلبل مرتديًا "تي شيرت" يلتصق بجسمه النحيف، فتظهر ريش صدره مع حدبة بسيطة بظهره، ويرتدى أيضًا "بنتاكور" أي ما هو ليس بـ شورت ولا بنطلون، ويجلس أمامه المذيع، وأمامهما الكاميرا وعلى بعد يجلس المخرج الذى حيرته عينا بلبل، حيث كل عين تنظر فى اتجاه فكان قراره "ملكوش دعوه بوشه")
المذيع: من حديقة فيلا الكابتن الكبير "بلبل حيطة" التقينا به، ورغم ضيق وقته مشكورًا حرص على أن يكون معنا ليتواصل مع معجبيه.. كابتن بلبل ما هو تقييمك لمسابقة الدوري العام؟
- بلبل "يأخذ نفس عميق تصحبه.. تنهيقه.. أسف تنهيدة": بصراحة الدوري السنة دي كان جامد قوي جدًا خالص.. لدرجة إن حوالي 20 لاعب أصيبوا إصابات خطيرة، أخفها ارتجاج المخ.. وبغض النظر عن نتايج المباريات المنافسة شديدة موت طحن "لا مؤاخذة"..
المذيع: تفتكر إيه السبب وراء بُعد فريقك "سِبرتو أف سبورت" عن المنافسة وأنه مهدد بالهبوط؟
- بلبل "بنرفزة وهو يدعك قفاه": أنا عارف إنك بترمي للناس الحاكدة اللي بتقول السبب أني خفيت ورجعت ألعب تاني لأ.. وألف لأ.. السبب بصراحة قلة الحظ والانطهاد التحكيمي، مع عدم الثبات الانفعالى وارتفاع نسبة الرطوبة وقلة السكسوجين بالجو والترهيب الجماهيري مع الاحتباس الحرامي وخُرق الأوزول..
"يعتدل في جلسته مبتسمًا بنشوة الانتصار للرد شديد البلاغة"، ثم يكمل: أنا عن نفسي قدمت كل اللي عندي ومبخلتش على الفريق لا بمجهودي ولا بخبراتي.. وأنا من هنا بقول للجنة الحكامين نظرة لينا، وكفاية ظلم يا أما حننطر نشتكي للفيتا أو الأسطنبولي
المذيع : ممكن يا أبو الكباتن نتعرف على برنامجك اليومي اللي هو أكيد سر تفوقك؟
- بلبل: في الحقيقة أنا بابتدي يومي بدري.. يعني أصحى الساعة 11 الصُبح، أخد حمامي وأشرب الكسكافين بتاعي مع حتة توستن، وسيجارة الإصتباحة، وبعدين أنزل أعمل جوله سريعة على مجموعة أعمالي يعنى أتابع عربية الفول وعربية الكشري والولاد بتوع المناديل والفُل والكافين شورت بتاعي..
"مبتسماً": يعني شوية حاجات تأمن مستقبلي.. وبعدين أخطف رجلي للنادي ألحق شوية تدريب أو لو فيه ماشت باروح على الأستاد بدري شوية عشان عم عبده يدخلني من غير تذكرة.. أما باليل بعد الماشت باستخبى من الجمهور في المدافن.. أما غير كده تلقيني في الكافين شورت بتاعي، وكبيري قبل الفجر لازم أكون نايم.. يعنى زيي زي أي رياضي عادي
المذيع: عظيم.. عظيم.. وإيه بقى أخبار احترافك؟
-بلبل: أنا بالفعل قربت من الاتفاق مع فريق "طوب الأرض" من فرق الدرجة التانية المكيف بألمانيا، بس هما عاوزيني انتقال كامل وأنا بقول لا أروح على سبيل الدعارة عشان لو الحال معجبنيش و..
المذيع "مقاطعًا": سمعنا إن العرض مقابل مليون يورو للنادي ونص مليون لك ده غير العربية والفيلا؟
- بلبل "مقاطعًا بفخر شديد": فعلًا.. وأنا كمان طالب كيلو كباب بسلاطاتة يوصل لأهلي كل شهر.. والفلوس مش كل حاجة المهم المال اللي يأمن الدنيا
المذيع: طب والأهلى والزمالك؟
- بلبل: والله مع احترامي للناديين الكبار وداخل معاهم فريق بيراميس.. لكن لازم أخوض تجربة الاحتراف.. لكن لو هيدفعوا بالدونار، يبقى أنا تحت أمرهم بدون أي شروط وده شرف ليا
المذيع: رغم إنك مدافع إلا إنك مشهور بأهدافك.. يا ترى إيه أهم أهدافك؟
- بلبل: أنا الحمد لله جبت 10 أجوان في الدوري، لكن أهمهم بالنوسبتِ لي هو الجون اللي جبته في الفريق المنافس "يبوس وجه وظهر كفه"
المذيع: إيه رأيك نعرض لقطة من أحلى مبارياتك؟
- بلبل: قوي قوي
الصوت: (حباقة لشطاطة طويلة للهلف اللي بيجري بس معاه مين؟ معاه بلبل حيطة.. إيه ده يا نهار أبيض.. الهلف وقع على الأرض وبلبل لسه بيجري بالكورة.. داخل على جونه.. رقص الجون حطها جوه الجون.. الله يحرقك يا بلبل ضيعت فرقتك يا ابني).
- بلبل "يبتسم بفخر": الحمد لله دي من أحسن مبارياتي.. خسرنا فيها 5 بس
المذيع: يا ترى إيه سر تسميتك بـ "بلبل حيطة"؟
- بلبل: هي "بلبل" جت من أني بأقف سرحان وبأغني في منطقة الجزاء.. أما "حيطة" عشان المهاجمين بيخبَطوا فيا من غير ما أجى جنبهم.. لكن أنا اسمي الحقيقي "سيد خرابة".. والحمد لله
المذيع: ومين بقى مثلك الأعلى؟
- بلبل "واضعًا رجل على رجل": بصراحة مفيش، وأتمنى أن أثبت نفسيتي وأبهر الدنيا مع فريق "طوب الأرض" ويا رب نكسب دورة ألمانيا الرمضانية.. وهى أهم بطولة في أوروبا
المذيع: وفى الختام.. تحب تقول إيه للناشئين؟
- بلبل: ببساطه شديدة أقول لهم حاولوا تستغلوا فترة وجودكم بالملاعب في عمل أكبر كمية بزنس وفلوس أما الكورة فهتيجي بعدين لوحدها..
(ثلاثة موبايلات ترن وتخرج من كل منها رسالة الأولى بـ30مليون، الثانية بـ50 مليون، والثالثة ب 100 مليون)
المذيع: أبو الكباتن.. سعدنا بيك ومعاك وتصبح على خير.. عزيزي المشاهد إن كنت لسه بتتابعنا يبقى معندكش دم وتستاهل اللي جرالك.