زوجة أحمد عبد العزيز: "احترموا سنه وتاريخه"
علقت الصحفية دينا شرف الدين، زوجة الفنان أحمد عبد العزيز، على الانتقادات التي وُجهت لزوجها بعد تداول فيديو اعتبره البعض تجاهلًا لمد يده للسلام على أحد المعجبين.
قالت زوجة أحمد عبد العزيز في مداخلة هاتفية مع برنامج "الستات"، مساء اليوم، المذاع عبر شاشة "النهار"، مع سهير جودة ومفيدة شيحة: "القصة غريبة جدًا، والمثل بيقول: همّ يضحك وهمّ يبكي، إحنا بقينا في زمن لازم يكون فيه ترند شغال وتنمّر على أي شخصية عامة، سواء فنان أو غيره، بقى فيه حالة مخيفة من إننا نترصّد لبعض ونتنمّر على بعض، وده مش طبع المصريين".
تابعت: "الواقعة اللي بيتكلموا عنها حصلت وإحنا رايحين مهرجان، وأنا كنت شاهدة عليها، أنا كنت ماشية ورا أحمد شوية، بتكلم في التليفون مع ابني في موضوع عائلي، وهو كان ماشي قدامي، خلّصنا الفعالية في الأوبرا ومروّحين، وفوجئنا تاني يوم إننا ترند، وإنه اتقال إن أحمد كسر خاطر المعجب، وكأن حصل شيء كبير".
أوضحت: "الفيديو اللي اتنشر بيظهر إن أحمد كان مستعجل، وأنا كنت وراه، وفيه حد كتب إنه مغرور والمعجبة بتجري وراه، بينما الحقيقة إن الشخص ده أنا وكنت ماشية بتكلم في التليفون، وحتى لو كانت معجبة، ما كانش فيه أي مشهد جري وراه زي ما صُوّر.. للأسف، أنا شايفة إن فيه خطة ممنهجة لهدم الرموز الفنية الكبيرة، خصوصًا الفنانين اللي تاريخهم نظيف وسمعتهم محترمة، وأحمد واحد منهم، شفت التعليقات وكانت قاسية جدًا، وده مش طبيعي أبدًا يكون رد فعل على موقف بالشكل ده، أنا متأكدة إن فيه لجان بتشتغل لتكبير الموضوع وإشعال الهجوم، بكلمات تستفز مشاعر الناس".
تابعت: " احترموا سنه وتاريخه، وأنه عمل حاجات كتير عمرها ما كانت مشينة ولا وحشة أبدا، ولا أذت أي أسرة مصرية"، وذكرت أنه قبل سنة حصلت واقعة مشابهة،عندما كان الفنان خارج من عزاء، وشاب من ذوي القدرات الخاصة "شدّه من هدومه"، لينفعل لأنه لم يكن يعلم من هذا، وعندما علم، استقبله فيي منزله، متابعة: "المشكلة مش في الموقف نفسه، لكن في الناس اللي بتصوّر وتحوّل أي حاجة لترند".
استكملت: "المفاجأة الأكبر إن رئيس المهرجان صفوت يوسف اللي كنا فيه، وهو (المهرجان المصري الأمريكي) في الأوبرا، كلّم أحمد وقال له: مش فاهم الحملة دي معمولة عليك ليه، الولد اللي في الفيديو ده واحد من المنظمين، وهو نفسه اتفاجئ إنه ترند، الولد قال للأستاذ صفوت يوسف إنه ما حصلش منه أي حاجة وحشة، وإنه كان هو اللي غلطان لأنه حاول يسلم وأحمد كان مستعجل داخل عشان الافتتاح بدأ وإحنا متأخرين".