بـ كلمات مؤثرة.. هدى زاهر تحتفل بتخرج ابنتيها "ملك و"ليلى"
احتفلت هدى زاهر، بتخرج ابنتيها "ملك" و"ليلى" من الجامعة، ووجهت لهما رسالة مؤثرة تعبر فيها عن مشاعر السعادة والفخر التي تشعر بها بسببهما.
كتبت "زاهر" من خلال خاصية "ستوري" عبر حسابها الرسمي على موقع التواصل الاجتماعي وتبادل الصور والفيديوهات "إنستجرام": "محتاجة أقول كلمتين من قلبي، أنا شيلت ملك على إيدي وأنا عندي 19 سنة، كنت طفلة شايلة طفلة، وشيلت ليلى وأنا 20 سنة والطفلة لسه مكبرتش برضه، ملحقتش، وكبرت معاهم وكبروا معايا، عيشنا مع بعض أيام حلوة وأيام صعبة اوي".
تابعت: "لولا وجودهم جنبي وهما صغيرين ودعمهم ليا ولأبوهم وهما صغيرين جدًا، كنت بستغرب بيجيبوا القوة دي منين؟ دول لسه صغيرين! واكتشفت أني معنديش أصحاب ولقيتهم ألذ بنات ودمهم خفيف وعسل وسكر، وماهو كده كده الأم لازم تصاحب بناتها بس صداقتنا كان ليها شكل تاني".
أضافت: "ملك، أنتي مش بنتي، أنتي أمي وصحبتي وكاتمة أسراري وآخذة مشترياتي، وأحن قلب عليا على وش الأرض".
أكملت: "ليلى، أنتي صحبتي اللذيذة اللي دمها زي الشربات، بتهوني عليا الدنيا وبتبسطي لي كل الأمور وبتلبسي لبسي قبل ما ألبسه".
أشارت: "النهاردة اتفرجت على مجهودكم وتعبكم، والله حسيت بفخر كده وبصيت للسما وقلت لربنا شكرًا على أغلى وأجمل بنتين وهديتين، أغلى من كنوز الدنيا. شرفتوني بأخلاقكم وتربيتكم ودراستكم، وشكرا يا حبيبي يا الله أني عيشت وشوفت نجاحهم وخلتني فخورة ببناتي في وسط عبادك".
اختتمت رسالتها لهما: "مشاعري متلغبطة اوي وحاسة بفرحة وفخر.. ربنا يجبري قلبكم أنكم خليتوني يا بنات قلبي وروحي أحس بيه، ألف مبروك يا حبايبي".
