هاني عادل: شيرين كانت بتغني وصوتها مكنش متسجل

دافع الفنان هاني عادل عن الفنانة شيرين عبد الوهاب بعد أزمة حفلها الأخير في ختام مهرجان موازين بالرباط، موضحًا أنها كانت تقوم بالغناء بشكلٍ حقيقي وأن صوتها لم يكن مسجلًا كما أشاع البعض.

كتب "عادل" عبر حسابه الرسمي على موقع التواصل الاجتماعي "فيس بوك" :" عشان بس نخلص الموضوع ونبان برضه إننا ناس فاهمين في المزيكا بشكل حقيقي، أو اللي حابب يعني يبين أنه فاهم ومذاكر وكده، هعملكم فيديو عن الفرق بين (البلاي باك) و(المسارات الخلفية - backing tracks)".

تابع: "بس الناهية يعني أنا دخلت شوفت حاجات من الحفلة قبل ما أكتب، شيرين كانت بتغني بشكل حقيقي مكنش صوتها متسجل، والدليل على كده أنها لما كانت بتغلط كانت بتوقف المزيكا لأن في (المسارات الخلفية - backing tracks)" الأغنية هتبدأ لازم العازفين والمطرب يبقوا حافظين الدخول، والموسيقيين حافظين كل المفاتيح بالمللي، لأن الغلطة مفيهاش رجوع".

أردف: "يعني الفرقة لما تكون بتلعب لوحدها ممكن يلحقوا الغلطات، ممكن يعيدوا ويزيدوا في الأغنية لكن مع (المسارات الخلفية - backing tracks) الفرقة بتلعب والمغني بيغني بشكل حقيقي وبيكونوا سامعين في ودنهم العد والإيقاع وبعض الإرشادات في الأماكن اللي ممكن يكون معاهم إيقاعات إلكترونية زيادة صوت بعض الكورال، وكلها حاجات علشان تحسن الكواليتي على المسرح وتخليه بنفس الكواليتي زي الألبوم".

نرشح لك: "برافو أنك بتتغلبي على تعبك".. رسالة هالة صدقي لـ شيرين

أضاف: "مصر كلها بتعمل ده، أيوه مصر كلها، والعالم؟ اه معظمه ما عدا بعض أنواع الموسيقى والأشكال اللي مش بتحتاج ده بس معظم الشائع بيعمل كده، أي مغني هتبقى غلطته الوحيدة أنه مذاكرش كفاية مع فرقته واستسهل، ساعتها هتحصل مصايب على المسرح".

اختتم حديثه: "بتمنى أن اللي بيتكلم عن الموضوع يكون مذاكر هيقول إيه علشان ميظلمش حد وميظلمش نفسه".