رانيا محمود ياسين: السوشيال ميديا بتدمر الرموز العامة
تحدثت الفنانة رانيا محمود ياسين عن سلبيات مواقع التواصل الاجتماعي ودورها في تدمير الرموز العامة من خلال تزييف الحقائق.
كتبت "ياسين" عبر حسابها الرسمي على موقع التواصل الاجتماعي وتبادل الصور والفيديوهات "إنستجرام": "نفسي تسكتوا شوية.. دع الخلق للخالق. نفسي تفهموا أن 99% من اللي بيتصدر على السوشيال ميديا عايزك تشتم الشخصيات العامة علشان تكره عشيتك وتشوفهم دايمًا ناس ما يعرفوش ربنا أو نرجسيين أو متربوش أو مغرورين".
تابعت: "ده مقصود وعن عمد علشان الفنانين مثلًا بعد ما كانوا قوى ناعمة ومؤثرين، يبقوا الناس المفضوحين، محدش منهم يبقى قدوة ولا رمز ولا قيمة مؤثرة زي زمان".
أكملت: "محدش سأل نفسه ليه زمان الفنان كان قدوة ومؤثر؟ لأن مكنش في أداة مدمرة اسمها السوشيال ميديا، وكان في حاجه كيوت أوي بالنسبة لدلوقتي اسمها الصحافة الصفرا، بس عمرها ماكانت مؤثرة، بالونة وبتفرقع وتخلص لكن الهري دلوقتي لازم يدخل في أسبوع كحد أقصى".
نرشح لك: أمير عيد يكشف عن مشروع غنائي جديد لـ "كايروكي"
أضافت: "نفسي تبطلوا تصدروا أحكام من السوشيال الميديا لأنها والله أداة كاذبة بكل صفحاتها ومانشتتها المستفزة، وفيديوهتها اللي بتتقال بأصوات ناس مجهولة عايزه تعمل ريتش وفلوس على حس سمعه الفنانين، ومعظم النقل كاذب فيما عدا اللايف وبعض الصحفيين المتخصصين اللي بيحاولوا يقولوا الحقيقة وسط كم الزيف اللي بيتصدر".
أشارت: "علي سبيل المثال، السقا ومها الناس مش رحماهم، سيبوهم في حالهم، ارحموا أولادهم، كلنا عندنا بيوت ومشاكل وأولاد بنخاف على شكلنا وشكلهم، بطلوا تصدروا أحكام وادعوا ربنا يهدي الأمور ويصلح الأحوال بدل الهجوم طول الوقت عليهم وعلي غيرهم".
أردفت: "وذكري للسقا ومها لأن ده موضوع الساعة وربنا يهدي يارب ويرحمنا من هذه الأداه التي تدمر القيم والرموز. ومحدش يقولي وإحنا مالنا أنتم الي بتصدروا حياتكم، هرد وأقولك لأ السوشيال ميديا بتحاصر حياتنا وبنتصور طول الوقت حتى من غير ما نعرف، وبتزيف معظم الحقايق وبتديها أكبر من حقيقتها، ده غير اللجان المدفوعة وكفاية كده".