كريم محمود عبدالعزيز: مكالمة من وحيد حامد أنقذتني من الانهيار
روى الفنان كريم محمود عبدالعزيز تفاصيل مرحلة صعبة مر بها بعد وفاة والده النجم الكبير محمود عبدالعزيز، مؤكدًا أنه واجه ارتباكًا فنيًا وشخصيًا كبيرًا بعد تلك الخسارة.
وقال كريم خلال استضافته في بودكاست «فضفضت أوي» الذي يقدمه المخرج معتز التوني: "نزّلنا فيلم اطلعولي بره بعد وفاة أبويا، وكنت حاسس إني لازم أنجح... بس الفيلم منجحش، ومن وقتها حسيت إني تايه، لأن أبويا خلاص مش موجود أسأله أو يرجّعني للطريق".
وأضاف: "وهو عايش كان مهما حصل هيشيلني، مثلا هيبقى في جزء تاني من جبل الحلال هيظبطني، الوضع هيعدي... لكن بعد وفاته، قفلت على نفسي وفضلت أسأل: هعمل إيه؟ هل كده خلاص؟".
وأوضح كريم أنه قرر خوض تجربة مسلسل هوجان كمحاولة لإنقاذ نفسه فنيًا ونفسيًا، قائلًا: "خدت هوجان وقلت لا، لازم انجح بقى... ذاكرت واجتهدت وربنا وفقني، والدور نجح مع الناس... بس أنا مكنتش حاسس بالفرحة، كنت داخل في حالة غريبة وضلمة، واللي حواليا يقولولي افرح، وأنا مش عارف".
وكشف كريم عن لحظة فارقة في مسيرته، حين تلقى اتصالًا مفاجئًا من الكاتب الكبير وحيد حامد، قائلًا: "صحيت من النوم لقيت رقم غريب... قولت أكيد متصل بكريم عبدالعزيز التاني، مش أنا! لقيته بيقولي: يا كريم يا حبيبي، قولت ده كريم عبدالعزيز اكيد، لحد ما قال هوجن، قولت لأ بقى ده أنا كريم محمود عبدالعزيز بجد".
وتابع: "قالي: أنا عندي فيلم عايزك فيه... وساعتها اتأكدت إنه بيكلمني أنا، خفيت في اللحظة دي، حسيت إني ناجح وإن كله تمام".
وأشار كريم إلى أنه بالفعل جلس مع وحيد حامد وبدأ التحضير لمشروع سينمائي مع المخرج محمد ياسين، لكن المشروع تعثّر بعد رحيل الكاتب الكبير، قائلاً: "اشتغلنا عليه وعدت سنة، لكن أستاذ وحيد تعب وتوفى، ومبقاش معروف مصير الفيلم لحد دلوقتي".