هيدي كرم ترد على المنتقدين: لو شتمناكم هتنتحروا
وأوضحت هيدي كرم في فيديو عبر حسابها على إنستجرام، أنها تتحدث بالنيابة عن الفنانين، وتحديدًا الفنانات، قائلة: "إحنا اتهرينا والله كمشاهير، بتكلم بصراحة بالنيابة عن مشاهير وخاصة الستات زيي.. اتهرينا من الشتيمة والتهزيق وقلة القيمة والإرهاب على السوشيال ميديا وإنكم بتحسسونا إننا منسواش".
تابعت: "اتهرينا من إننا نتشتم ونتهان ونتهزق بجد والله حقيقي ده كتير هو الأحمر ده مفيش! مفيش شوية دم وإحساس".
وأضافت: "اللي بيشتمونا على السوشيال ميديا وإحنا طالعين وإحنا نازلين وإحنا بنحاول نعمل محتوى لذيذ وندي طاقة إيجابية لأني بذاكر السوشيال ميديا عشان أشوف إيه اللي نافع لقيت مفيش حاجة نافعة".
وواصلت: "صدقوني الناس اللي بتشتمنا لو شتمناهم نفس الشتيمة هينتحروا تاني يوم، إحنا عندنا جهاز عصبي قوي جدا، ولكن صدقوني لو اللي بيشتمونا اتشتموا نفس الشتايم واتهانوا نفس الإهانة والله العظيم هتقطعوا شرايينكم من حجم الاضطهاد والإهانة والمهانة، بس إحنا مش هنعمل كده لأننا محترمين وبنقدر مشاعر الآخرين اللي هي مش عندكم خالص".
واختتم هيدي كرم تعليقها قائلة: "شوفوا لكم لعبة تانية لأن كرامتنا مش لعبة في إيدكم، وبالراحة علينا، خفوا على بعض شوية مفيش بيننا وبينكم تار ونجاحنا مش معناه فشلكم.. أرجوكم بالراحة على أخواتكم الفنانين الطيبين الحلوين اللي بيعملوا لكم حاجات حلوة".