بعد وفاة أشرف مصيلحي.. هبة الأباصيري: قربوا من ربنا

تحدثت الإعلامية هبة الأباصيري عن وفاة الفنان أشرف مصيلحي وتأثرها بهذا المصاب الجلل، مؤكدة أن الموت موجع ولكنه أيضا يجب أن يكون تذكرة وإشارة للجميع، خاصة وفاة الشباب.

قالت "الأباصيري" خلال حلقة اليوم من برنامج "الستات مايعرفوش يكدبوا" المذاع عبر شاشة "cbc": "الفنان أشرف مصيلحي شخص محترم وخلوق توفى في سن الشباب، وده اللي بيوجع، لأنه لسه شاب صغير كان طول بعرض قدامنا.. شريط كامل مر قدام عينيا لراجل كان موجود وسط أهله وبيته وأسرته وفجأة جاء الأجل، الموت بيوجع بس لازم كمان يفوق".

أضافت: "الموت بيوجع والمفروض أنه كمان يفوق، وخاصة موت الشباب، لأنه من علامات يوم القيامة، لازم طول الوقت نبقى واخدين بالنا من التذكرة والإشارة، بفكر نفسي قبلكم، لأن موت الشباب بيخوف وبيخلينا نفتكر أنها مش بالسن.. محدش يقول (أنا لسه صغير هبقى أصلح أحوالي مع الله بعدين)".

تابعت: "الدنيا مش مستاهلة وجع ولا أذية ولا الغلط اللي بنعمله، من غير حتى ما نكون بننبسط بيه، ولا أننا نبعد عن ربنا أوي ونقطع حاجات أولها الصلاة".

أكدت: "أنا مش شيخة وكلنا عندنا أخطاء ومقصيرين؛ بس في حد بيحاول يصلح الغلط وحد بيكمل وبينزل على قلبه غشاوة.. ياريت نحاول نحافظ على الحبل اللي بينا وبين ربنا، واللي أهم حاجة فيه هي الصلاة، دي الصلة اللي لو اتقطعت دنيتنا هتروح في مكان وحش أوي".

استكملت: "حتى لو بتعمل الغلط صلي وخليك قريب من ربنا بقلبنا مش بالشكل، ونمنع أذانا على الناس، لأن ربنا بيسامح في كل شيء إلا ظلم الناس افتكر هتقول لربنا إيه لما تقابل ربنا في حق العباد".

اختتمت: "علاقتك بربنا بتاعتك وهو الوحيد اللي مطلع عليها واللي عارف اللي جوه قلبك مهما كان في أخطاء عندك.. محدش يقدر يحكم مين هيخش الجنة ومن هيخش النار.. خلونا نعيش في الدنيا خفاف على بعض ونمشي منها سايبين سيرة كويسة وكلمة حلوة وجبر خاطر وآثر طيب".

يشار إلى أن الفنان أشرف مصيلحي، توفى مساء أمس، عن عمر ناهز 49 عاما، وذلك بعد معاناة مع المرض حيث كان مصابا بورم خبيث بالمخ.

وكانت قد تدهورت حالته الصحية خلال الفترة الأخيرة، حيث كشفت المخرجة منال الصيفي، منذ حوالي أسبوع آخر تطورات الحالة الصحية لزوجها الفنان أشرف مصيلحي، موضحة أن حالته تدهورت مؤخرا حيث إنه مصاب بورم خبيث بالمخ.