تامر عاشور لـ عمرو مصطفى: ماينفعش تخلي منظرنا وحش!

علق الفنان تامر عاشور على تصريحات الفنان عمرو مصطفى المتتالية عن فنانين مصر، موضحا أنه يعتبرها إهانة تسيء لشكل فنانين مصر.

قال “عاشور” خلال لقائه في برنامج “حبر سري“، المذاع عبر شاشة القاهرة والناس: “عمرو مصطفى من أعمدة الموسيقى في مصر، لكن لا يصح انتقاده لكل الموسيقيين في بلده، وهو عنده مشكلة مع فنان واحد فقط، هو مقالش عليا حاجة وحشة ومش شرط يرمي عليا كلام، لو حابب ينتقدني، ينتقد زي ما هو عايز، يقول الأغاني بتاعته مش حلوة، حفلاته مش ناجحة، بيغني دراما بس، يقول كما يشاء.. لكن يقول محدش نجح خالص غير من على جيتار عمرو مصطفى؟ دي بدعة”.

نرشح لك: تامر عاشور: مستحيل أغني مهرجانات

أضاف: “أنا بحبه جدا ومن الناس اللي تأثرت بفنه، لكن لازم يعرف إن في ناس بتسمعه وتسمع كلامه، مينفعش كل ما تطلع تخلي منظرنا وحش.. في ناس كتير ناجحة”.

أردف أنه لا يمانع التعاون معه لو سمحت الفرصة في أي مشروع، مضيفا: “فهو فنان كبير وتاريخ كبير، وده اللي بيخلي الناس تسمعه وتسمع كلامه لكن مش عشان عنده موقف مع مطرب واحد يبقى ناقم على كل المطربين الكبار”.

في سياق منفصل، أكد الفنان تامر عاشور، على استحالة تقديم أغاني مهرجانات في أي وقت واصفا المهرجانات بأنها “تقليعه”.

قال “عاشور” خلال حلوله ضيفا على برنامج “حبر سري”، مساء الخميس، المذاع عبر شاشة “القاهرة والناس” مع أسما إبراهيم: “لا يمكن أغني مهرجانات مستحيل، وهو مش لون فني ولكن هو تقليعة، والسوق مستوعب أن المهرجانات تنجح دي حاجات تخص السوق”.

أوضح أن هناك مهرجانات ناجحة وهذا شيء جيد ولكن في النهاية المهرجانات “تقليعه”، مردفا: “مش هنيجي مثلا بعد 10 سنين نلاقي مهرجانات مستمرة “.