دياب: "مش شايف صالح شرير وواكل مال اليتامى"

دياب عن دوره في تحت الوصاية
قال الفنان دياب، إنه لم يفكر في الاتجاه للتمثيل منذ بدايته، فكان يفضل شهرته في الغناء، والمشاركة في التمثيل كنوع من أنواع الترفيه “والهزار”.

تابع دياب خلال اتصالا هاتفيا ببرنامج “التاسعة“، مساء السبت، المذاع عبر شاشة القناة الأولى المصرية مع يوسف الحسيني، أن البعض كان يشجعه على التمثيل، مردفا: “الله يرحمه الأستاذ محمود عبد العزيز كان عايزني معاه في مسلسل (باب الخلق)، واعتذرت خوفت أمثل أصلا، كنت شايف إني معنديش جاهزية أمثل ومش حاسس أن أنا أصلا موهوب، وكنت بقول لأ دا حرام الفرصة دي حد أحسن مني ياخدها”.

أشار إلى أنه استمر في رفض التوغل في عالم التمثيل حتى عام 2014، عندما عرض عليه المخرج أكرم فريد دور شرير في “ساحرة الجنوب”، مضيفا: “وتوكلت على الله وعملت الدور والحمد لله نجح، وبعدها حسيت بمتعة التمثيل واتوكلت على الله وكملت، والناس حبانا الحمد لله”.

وعن تجسيده لأدوار الشر يقول: “أنا بحس إني لازم أصدق الشخص دا وأصدق دوافعه، لو صدقت دوافعه هبقى هو.. أنا بجد بصدق اللي بعمله، وشخص زي صالح الناس كلها شايفه شرير وواكل مال اليتامى، أنا مش شايفه كده خالص لأنه عنده دوافع للي هو بيعمله”.

أشار إلى أن “حنان” الشخصية التي تجسدها منى زكي تراه “واكل مال اليتامى”، مضيفا: “لكن هو بالفعل مبيسرقهمش، هو مش شاطر في الشغلانة دي، ومش جامد زي أخوه في الشغلانة فمش بيدخل نفس المبالغ اللي كان أخوه بيدخلها فهي ظانة فيه أنه بيسرقها وهو مش بيسرقها.. وكمان دا شخص صحي من النوم لقى المركب اتسرق من مرات أخوه، فهو حس أن ست تجبرت عليه ومش عارف يواجه المجتمع.. هو شخص مش شرير لكنه شخصية رمادية، بني آدم عادي جواه الخير والشر بيتصارعوا، وساعات الشر بينتصر عليه بسبب ضعفه”.