أحمد حسن: "ابني في المقاولين وممكن أوديه الأهلي أو الزمالك"
حل اللاعب السابق أحمد حسن، نجم منتخب مصر الأسبق، ضيفا على برنامج كابيتانو مصر في حلقته المذاعة اليوم، حيث زار معسكر كابيتانو مصر، وتحدث مع اللاعبين قبل مباراة العودة في نهائي البطولة بين فريقي حمادة إمام وعلى أبو جريشة.
قال أحمد حسن للاعبين، عن وصولهم لنهائي البطولة خير دليل على أنهم الأفضل، وأن فرصهم أفضل لإثبات أنفسهم بشكل أفضل بالفوز باللقب. مضيفا: “الناس كلها متابعة كابيتانو مصر ولاعيبته، وإحنا عندنا فيه لاعيبة كويسة”.
نرشح لك: شاهد.. الإعلان التشويقي لفيلم يوم 13 لـ أحمد داود
كما وجه نصائح هامة للاعبين، قائلا: “كل واحد يحط لنفسه هدف لازم يوصل ليه، لأن وإحنا في السن بتاعكوا ملقناش الفرصة دي، الكل يشتغل علشان يوصل لهدفه، خلي دايما عندك هدف حتى لو وقعت قول لازم أقوم وأكمل، ولاعبين كتير وقعوا وكملوا مشوارهم بالفعل”.
على الجانب الآخر، وفي لقاء مع الإعلامية لينة الطهطاوي، قبل انطلاق مباراة النهائي، قال أحمد حسن، إن كابيتانو مصر خلق حالة جيدة لدى كل الجمهور، والجميع يتابعه عن كثب وسعيد به”. مضيفا: “كل الناس مبسوطة بالبرنامج، وفيه اهتمام كبير، وإن شاء الله نوصل في الآخر ويكون فيه نجوم توصل أندية كبيرة وتمثل منتخبات مصر”.
وتحدث عن بداياته وممارسته كرة القدم قائلاً: “كنا بندور على فرصة زيهم، وأنا لما طلعت من الصعيد وبالتحديد من محافظة المنيا كنت بدور على أي فرصة، ولعبت في أندية محلية ثم أهلي وزمالك، وبعدها خليت هدفي أحترف، وبعدها حطيت في دماغي أني أكون في المنتخب، وبعدها قولت لازم أكون الكابتن، وكملت لحد ما بقيت عميد لاعبي العالم، ولاعبي كابيتانو أتيح ليهم فرصة يظهروا مهاراتهم، وبقى فيه تفاعل كبير جدًا من الجمهور”.
كما حكى عن مواقف النهائيات والمباريات الهامة التي لا ينساها قائلاً: “أول نهائي ألعبه كان في بطولة كأس الأمم الإفريقية سنة 1998 والمباراة كانت الساعة 3 عصراً، وكنت في بداية العشرينات وفضلت قاعد صاحي للصبح، ومحدش كان يتخيل إننا ممكن نكسب، أنا نمت 3 ساعات بس، وكنت حاسس إني مرهق، ونزلت الملعب قدرت أجيب هدف وناخد البطولة وكان يوم تاريخي بالنسبة لي”.
تحدث عن أنه بدأ ممارسة الرياضة كلاعب كرة سلة بجانب كرة القدم، إلا أنه اتجه كلياً لكرة القدم. وتحدث عن نجله “الحبيب” قائلا: “الحبيب ابني مش بيلعب في الزمالك ولا الأهلي بيلعب في المقاولون العرب، وأنا بتعامل معاه مش بطريقة الأب، وعايزه ياخد الطريق زي ما أنا خدته يلعب درجة تانية، ويثبت نفسه وموهبته، ودايما أقوله اجتهد واشتغل وعايز الناس تشوف مجهودك في الملعب، حتى لو هو مبيلعبش بقوله العيب عندك إنت مش عند المدرب لأن انت لو كويس بتبذل مجهود اكيد المدرب هيلعبك”.
أضاف :”كان ممكن أخلي ابني يلعب في الأهلي أو الزمالك، لكن أنا عايز النادي هو اللي يطلب”.
يشار إلى أن مباراة الذهاب في نهائي كابيتانو مصر انتهت بالتعادل الإيجابي بهدف لكل فريق.