“لعنة السوشيال ميديا صابت قلبي".. نورهان قنديل تعلن خلع الحجاب
أعلنت خبيرة التغذية والبلوجر نورهان قنديل عن خلعها للحجاب بعد أقل من شهر على ارتدائه، إذ كانت قد أعلنت ارتداء الحجاب 28 أكتوبر الماضي.
نشرت “قنديل” صورتها بدون الحجاب عبر حسابها بموقع التواصل الاجتماعي “إنستجرام“، وكتبت: “مش عارفة ليه كل ده حصلي، بس أنا في ابتلاء شديد ومعنديش تفسير ولا تبرير، بس أنا كنت بمر بمرحلة حزن وضعف شديدة من قبل لبسي للحجاب وقلبى وكل حاجة فيه كانت بتحركني ناحية الخطوة دي علشان أبقى أقوى لنفسي ولبناتي وشغلي، وربنا وحده بس هو اللي عالم ضميري ونيتي، بس النتيجة إني بقيت أضعف بكتير والخطوة دي بقت محتاجة مني قوة مش عندي”.
نرشح لك: أبرز تصريحات يسرا اللوزي عن أهمية التغذية السليمة
تابعت: “أنا أكيد حزينة إني مقدرتش أكمل في حاجة بحلم بيها من سنين وبدعي ربنا كل يوم أنه يختم حياتي بيها، وبدعي ربنا من قلبي يحببني في نفسي في الحجاب الصحيح اللي مقدرتش أعمله، وحزينة أكتر إني بعلن ضعفي وتشوشي واضطرابي اللي غلبني وسيطر عليه ومش عارفة موصلنى لفين. وأسفة طبعا طبعا أسفة إني دخلتكوا معايا في متاهة قرار شخصي، بس هو لأنه حاجة الواحد لازم يكون فخور بأنه يعلنها.. الحجاب ملهوش أي دعوة بأي توتر أنا بعيشه. بالعكس أنا عارفة إني أجمل بكتير وأنا لابساه، بس في فرق كبير بين إني أتخلى عنه وبين إني مش عارفة ألبسه بالشكل اللي يخليني قوية وواثقة وقد المسئولية
أو ده التفكير اللي للأسف بقى مسيطر عليه وأتخلل لقلبي. مش هحمل الناس طبعا مسئولية حاجة”.
أضافت: “بس أنا حاسة إني بمر بأزمة كبيرة وأكيد كل حاجة خير، وده يقيني بربنا، بس اللي اتكشفلي في الفترة البسيطة دي كان أكتر من تحملي ولأول مرة أركز فى حجم القسوة اللي في القلوب، مش عارفة ليه بس أظن لعنة السوشيال ميديا أصابت قلبي وبقيت حاسة أنه مش قادرة على كمية الصراعات اللي بعيشها بسببها ولا مبسوطة بأني شخصية عامة، أنا هعتبر كل اللي هيحصل من هجوم طبعا ده في ميزان حسناتي لأني أكيد محتاجة ده، بس يا جماعة وربنا وحده فقط يعلم أنا لا ولن أسعى في يوم لإرضاء أحد، أكيد سعيت بكل حب وقلب إني أسيب بصمة ونفع وأثر طيب لبناتي ولكل اللي بيحبني وربنا وفقني وأكرمني جدا”.
أردفت: “ربنا وحده عالم أنا بعيش إيه وهو وبس اللي يهمني، وبعده أمي وجوزي وبناتي وشغلي اللي تعبت فيه جدا، على فكرة أنا اجتماعيا وشخصيا فشلت كتير يمكن ده أول فشل يكون معلن بالتفاصيل لكن قولتلكم كتير أنا وقعت وقمت وهفضل أعافر بس بتعلم، وأظن اخدت درس يسمحلى أقول إن أي حد هيتدخل في حياتي الشخصية أو قراراتي أنا هعرضه لمسائلة قانونية، لأني مش معنى إني شخصية عامة يبقى أنا مستباحة.. أنا أم وزوجة وشخص بيصارع ضغوط الحياة كل يوم زي أي حد، أنا متقبلة الهجوم أو إلغاء المتابعات بصدر رحب جدا بس الاحترام مش اختيار.. عندي يقين أن ربنا هيلهمني الصواب ومش هيسبني وهيقويني ويسامحني لأنه أرحم بيه من نفسي”.
View this post on Instagram
