وفاء سالم تروي تفاصيل محاولتها للانتحار

كشفت الفنانة وفاء سالم معاناتها في السنوات الماضية من حالة نفسية سيئة، أدلت لمحاولتها الانتحار، وقام نجلها بإيداعها مستشفى للأمراض النفسية لمدة شهرين حتى تعافت تماما.

أوضحت وفاء خلال حوارها ببرنامج “الستات” على قناة النهار، أن نجلها شعر بأنه سيفقدها، قائلة: “أدهم لما اخدني المستشفى كان حاسس إنه هيفقدني، كنت رافضة دخول المستشفى وفي حالة إنكار تام، خاصة إن هو وقتها كان في فترة بيبني حياته ومحتاج ينجح ومحتاج أم قوية مش أم تعيط ومتشعبطة في ديله”.

نرشح لك: وفاء سالم عن غيابها: “مش عليا طلب”

تابعت: “ميزة أدهم إنه بيظهر في الوقت المناسب، هو مستقل عني، ويمكن ده عملي صدمة نفسية، وحسيت إنه هبقى لوحدي وهكمل حياتي لوحدي، هو كان عايز يستقل وده حقه، ويمكن فكرة استقلال أدهم عني دي كانت بداية التعب إنه يزيد عندي”.

أوضحت وفاء سالم أنها حاولت الانتحار من قبل، بعدما وصلت لمرحلة عالية من الهلاوس وغياب الإدراك، قائلة: “يوم الوقفة في سنة 2019، كنت لوحدي في البيت.. البيت عبارة عن فيلا 3 أدوار.. أنا قاعدة في آخر دور، وبيني وبين الدورين اللي تحت حديد في حديد في حديد لغاية البوابة الأخيرة للبيت، كنت فاهمة إن ده أمان وبأمن نفسي عشان قاعدة لوحدي، بس طلع له تأثير سلبي على النفسية”.

أضافت: “يومها لقيت نفسي عليت الهلاوس في دماغي وبقيت رافضة لكل حاجة بتحصل حواليا ومفيش تحكم في تصرفاتي، وبيجيلي نوبات بتخليني أوصل لمرحلة إن عاوزة أموت دلوقت، في اليوم ده حاولت إني انتحر وأنا مش مدركة ومفيش وعي، فضلت كده من بعد الفطار لحد الساعة 3 بالليل لحد ما سمعت صوت من بعيد بيقول (يا ماما) صوت أدهم ابني، أصحابي كلموه لما لقوني قافلة تليفوني، وجه عشان يدخلي معرفش وكلم المطافي عشان تيجي تطلع لي”.

استطردت وفاء سالم: “طفيت التلفزيون وقعدت استغفر وأصلي على النبي بالراحة، ونزلت على السلم بالراحة وأنا في نفس الحالة وكأني مش هنا، لحد ما وصلت عنده على آخر بوابة كنت في آخر نفس ليا.. وداني المستشفى وقعدت في العناية المركزة، والدكتور قاله الأفضل ماتخليهاش ترجع لنفس المكان تاني”.