بعد تعرضها لـ "عضة كلب".. رحمة حسن تكشف آخر تطورات حالتها الصحية
كشفت الفنانة رحمة حسن، عن آخر تطورات حالتها الصحية وذلك بعد تعرضها لإصابة قوية بسبب “عضة” كلب، تلقت على إثرها العلاج في مستشفى إمبابة، أمس الثلاثاء.
نشرت “حسن” عبر حسابها الشخصي على موقع تبادل الصور والفيديوهات إنستجرام، وكتبت: “أنا متشكرة جدا لاهتمامكم ولكل الناس اللي كلمتني تطمن عليا، وآسفة إني ماقدرتش ارد على معظم الناس لأني كنت تعبانة ومش قادرة اتكلم”.
نرشح لك: سارة الطباخ تكذب “الشرنوبي” وتتحرك لإيقافه عن العمل
تابعت: “أنا رحت المستشفى النهاردة وكشفت عند جراح متخصص وهو غير على الجرح وعمل اللازم والحمد لله طمني، وقالي اتابع معاه الفترة الجاية وإني هكون كويسة إن شاء الله والجرح هياخد وقته وهيخف”.
استكملت: “وبالنسبة للكلب فإحنا اتكلمنا مع صاحبته وطلبنا منها توديه مركز تأهيل وتدريب علشان تعدل سلوكه، وتبعت لنا الورق الرسمي اللي بيثبت إنها ودت الكلب فعلا، وإلا هاعمل محضر، وساعتها الكلب اللي هيتضر، ودي حاجه ماترضيش حد، وهي كانت متفاهمة جدا ووافقت وقالت إنها هتعمل كدا أول الشهر الجاي، علشان أخوها اللي هيوديه ويتولى مسئوليته، الحمد لله أنا كويسه والكلب كويس، وأتمنى إن صاحبة الكلب تصدق في كلمتها وتودي الكلب فعلا مركز تعليم ويبقى كويس”.
View this post on Instagram
كانت قد كتبت، صباح أمس الثلاثاء، عبر حسابها على موقع تبادل الصور والفيديوهات “إنستجرام”: “إمبارح الساعة 11 بليل كنت نازلة أجيب حاجة من السوبر ماركت جمب البيت، وكنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب (جيرمن شيبرد) تقريبا مَش متاكدة أوي، بيهجم عليا بكل قوته، طبعا حاولت أجري لكن للأسف الكلب كان قوي وشرس ووقعني علي الأرض”.
تابعت: “حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقه حساسة. صاحبة الكلب كتر خيرها أخذتني فورا علي مستشفى إمبابة، أدوني حقنة تطعيم الكلب ولسه فاضلي 4 هاخدهم خلال شهر، بس المشكلة أن من إمبارح الجرح بينزف دم كتير، وأنا طبعا خايفة ومصدومة”.
أضافت: “وتعبانة وعندي تروما من إمبارح، واللي واجعني أكتر إني مَش عارفة أتصرف ازاي.. خصوصا إني أكيد مَش عايزة الكلب يتأذي، بس كمان مَش عايزة أي إنسان كمان يتأذي ويتعض ويتبهدل في الشارع زيي.. أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه، إمبارح صاحبة الكلب قالتلي متخافيش هو عض ولادي قبل كدا وتمام محصلش حاجه! طبعا أنا أتصدمت لما عرفت أنها مَش أول مرة الكلب يعض حد ومع ذلك هي سايباه عادي في الشارع من غير كمامة أو حد قوي يمسكه”.
اختتمت: “بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسؤل مسؤلية كاملة عنه ويحاسب على إهمال مسؤليته، خصوصا لو إهماله تسبب لشخص تاني في أذى بدني يحتاج أكتر من 21 يوم علاج وأذى نفسي ماعرفش هايحتاج قد إيه عشان يخف. أنا كنت بحب أنزل أحط أكل ومايه للكلاب والقطط تحت البيت، دلوقتي أنا حقيقي مرعوبة أقرب منهم وخايفه جدا. أنا أسفة طولت عليكم بس أنا بجد مَش عارفة المفروض أعمل إيه عشان محدش تاني يتأذي”.