حمادة هلال: أهل بيتي بيخافوا مني بسبب "المداح 2"
شدوى ممدوح
أعرب الفنان حمادة هلال عن سعادته بتفاعل الجمهور مع مسلسل ”المداح 2”، وقال إنه لم يكن يتوقع ذلك من الحلقة الأولى، كما تحدث عن صعوبة تجسيد شخصية ”صابر المداح”.
أوضح ”هلال” خلال لقاءه مع “Et بالعربي”، إن تفاعل الجمهور مع مسلسل ”المداح 2” منذ عرض الحلقة الأولى منه، كان مفاجأة بالنسبة له، مشيرا: ”المفاجأة كانت كبيرة وأنا ماكنتش متوقع كده أنا قلت ممكن من الحلقة الرابعة أو الخامسة عشان الأحداث تسخن لكن من أول يوم كانت المفاجأة كبيرة اوي فالحمدلله”،
نرشح لك: أحمد والي: العمل مع حمادة هلال متعة.. ودوري في “وجوه” مختلف تماما عن “المداح”
كما أنه واجه صعوبات أثناء تجسيده لشخصية ”صابر المداح”، لافتا: ”كل حاجة لصابر بتتعمل صعبة وبرغم إن تمثيله بسيط لكن إحساسه صعب جدا، وكنت لازم أقفل أي مشهد بإفيه زي سبونج بوب مثلا، وكنت بقصد أعمل كده عشان أكمل المشهد اللي بعديه بطريقة تانية خالص”.
وعن اتهام بعض الناس له بالترويج للسحر والشعوذة، قال: ”صابر مش منجم، ده واحد عنده هبة، وأنا مش بروج للشعوذة، صابر المداح ده واحد أتورط في الحاجات دي من الجزء الأول، ولما تاب لربنا وخرج من العالم التاني، خرج بطريقة غلط فالعالم التاني ده بيحاول يأذيه في أهله، وهو بيحاول يدور على حل.. صابر مش بيعمل أعمال ده يعالج مثلا بنت صغيرة محسودة مش بتنطق، أو بنت مسحورة من إخواتها، وأنا مش شايف إن ده سحر”.
تابع: ”خلال التصوير كانت بتحصل حاجات غريبة، مثلا الفندق اللي كنت بصور فيه، في مرسى علم كانت أبوابه بتفتح لوحدها رغم إني بكون قفلها، وبقيت أشغل سورة البقرة بصوت عالي جدا، عشان إحنا مش هننكر العالم ده، وكان في مشهد بصوره في بيت وأنا بقرأ بعض الآيات لقيت البيت بيتهز جامد رغم أن الهوا مش جامد”.
أضاف ”هلال”: ”أنا أهل بيتي خايفين مني، ولما بيلاقوني سرحان بيقولولي مالك يا مداح، وفي يوم النور قطع بالصدفة عندي في البيت وقولتلهم بهزار عدوا معايا لحد 10 وهو هيرجع فقالوا بصوت عالي، وأول ما قالوا 10 النور رجع وطلعوا يجروا”.
بالنسبة لحذف الرقابة بعض المشاهد من المسلسل، أردف ”هلال”: ”الرقابة تعمل اللي هي عايزاه، دي رقابة بلدي وأنا بحترمها وهي شايفة إن ده صح فأنا مقدرش أقول إيه اللي أنتوا بتعملوه ده”.
اختتم: ”المفاجأة كانت كبيرة وأنا ماكنتش متوقع كده.. أنا قلت ممكن من الحلقة الرابعة أو الخامسة عشان الأحداث تسخن لكن من أول يوم كانت المفاجأة كبيرة اوي فالحمدلله”.
