بعد اعتزاله الفن.. شريف إدريس: بحترم نفسي ومش قابل إهانة في شغلي

علق الفنان شريف إدريس، على الجدل الذي أثير بعدما أعلن اعتزاله الفن، وذلك بسبب ظروف العمل في الوسط الفني والتي وصفها بالعبثية على حد قوله.

نشر “إدريس” عبر حسابه الشخصي على موقع التواصل الاجتماعي فيس بوك، وعلق: “معلش يا جماعة أنا بعتذر للجميع عن عدم ردي عالتليفون وأنا الحمد لله كويس وبخير، بس فيه كام حاجة مهمة جدا عايز أوضحها، الناس اللي بتقولي شيل البوست علشان ولادك.

نرشح لك: الشغل بالشحاتة.. الفنان شريف إدريس يعلن اعتزاله الفن

1- أنا مش محرج ولا مكسوف من اللي كتبته، واللي كتبته وحضراتكم مش قادرين تفهموه إني راجل بيحترم نفسه ومش قابل إهانة في شغلي اللي اتربيت فيه وولادي هيكبروا ويفهموا ده.

2- أنا ماقولتش إني فكرت أقتل عيالي أنا قولت إن الضغوط اللي أنا فيها وصلتني إني بحلم بكوابيس إني بقتل عيالي، وأظن كلكم بتحلموا بكوابيس، عيالي دول هما كل حاجه في حياتي لا يمكن أأذيهم ولا أفكر أأذيهم.

3- أنا ماقولتش اعتزلت علشان أتوب، أتوب عن إيه مش فاهم أنا شاركت من وأنا عيل صغير في أعمال محترمة الكل بيحبها، وعمري ما شاركت في حاجه خليعة”.

تابع: “4- الناس اللي واخدة البوست باستهزاء وتقليل وعدم احترام، دول مايتردش عليهم، اللي يستهزء في كرب بني آدم يبقى شخص عديم الإنسانية.

5- أيوة أنا بدور على فرص سفر كويسة مش علشان بكره البلد أنا بعشق تراب البلد دي أكتر من أي حد.

6- ناس كتير بعتتلي إن قناة الجزيرة مشيرة البوست بتاعي، وصفحات الإخوان، ودي مش مسؤوليتي وكل الناس عارفين موقفي الواضح تماما ضد الإخوان، وكل الناس عارفين إنهم بيصطادوا في المياه العكرة، والأهم إن أنا كل كلامي واضح وصريح ومالوش أي علاقة بالسياسة ولا اتهمت الدولة ولا قولت مؤامرة ولا قولت أي حاجة أصلا، دي أرزاق والأرزاق على الله وأنا راضي بقضاء الله وقدره، الحمد لله.

7- الحمد لله إني أخدت قراري وأنا واقف على رجلي وبصحتي لأن فيه زملاء وصلوا لمراحل صحية صعبة ربنا معاهم ويشفيهم، فأنا مش هستنى يجرالي حاجة وابقى راقد.

8- دعواتكم.. أنا الحمد لله كويس وبخير، وإن شاء الله كله هيعدي، من كان رزقه على الله فلا يحزن، تحياتي للجميع وشكرا ليكم ولمحبتكم”.

كان الفنان شريف إدريس، قد أعلن اعتزاله الفن، وذلك خلال منشور كتبه على صفحته الخاصة على موقع التواصل الإجتماعي، وذلك بسبب ظروف العمل في الوسط الفني والتي وصفها بالعبثية على حد قوله.

وكتب “شريف” قائلا: “بعد ٣٥ سنة سعي وتعب وشقي في الوسط الفني قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد..وده قرار أخدته بعد ما الأمور وصلت في الوسط الفني لمرحله عبثية.. وصلت إني بقيت بشوف بعض الزملاء بيشحتو الشغل علني علشان يشتغلو لان الشغل بقي متقسم على ناس معينة”

وأضاف: “فلو الأمور وصلت لكده أبعد أحسن..وحتى لما بيجي شغل بيتفرض عليك توافق باقل الفلوس وتخرج من الشغل مديون..ومواقف مهينه زي إن شركة انتاج تعرض عليك أجر هو قيمة ربع أجرك والسبب ان الميزانية مصروفة عالديكور..طب خلو الديكور يمثل!.

وروى أحد المواقف التي تعرض لها مؤخرا قائلا: “هحكيلكم موقف حصل معايا من أسبوع..اتصل بيا حد قالي عايزين حضرتك بكره عندك تصوير في مسلسل كذا بس هتدفع عشرة في الميه للكاستينج دايريكتور..كان هيجيلي جلطه بعد ماقفلت المكالمة ووافقت علشان أنا محتاج أشتغل ومحتاج فلوس..ومقدرتش استوعب الفكرة بصراحة إني بعد العمر ده مضطر أدفع علشان اشتغل فاتصلت واعتذرت…وده الحال حاليا إن الأمور بقت في ايد كاستينج دايريكتور..وده موقف من مواقف كتير مريت بيها لو حكيتها محتاجه كتاب مش بوست عالفيس.”

وتابع: “فطالما الشغل بقي لازم يتدفعله..وطالما الشغل بقي بالشحاتة..يبقي بلاش أحسن”.

وكشف “إدريس”، إنه يمر بمرحلة إكتئاب أوصلته إنه عندما ينام يحلم بكابوس إنه يقتل أولاده، أو يقتل نفسه لأنه وصل لمرحلة نفسية ومادية جعلته لا يقدر على تربيتهم ولا الصرف عليهم وتابع:” وأنا عندي تلات اطفال بعبدهم عباده متخيلين حجم المسؤليه..وبقيت مديون لطوب الأرض.”

وجدد الفنان طلب المساعدة في السفر للخارج لأنه حاول السعي للعمل في أي مجال آخر ولم يقدر.
واستكمل حديثه قائلا: “وحقيقي لو اتعرض عليا بطولات بعد البوست ده هرفضها لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شئ”.

وأشار إلى أنه سيغلق حسابه على الفيس بوك ويبيع هاتفه قائلا: “همسح ابلكيشن فيسبوك من تليفوني لاني هنزل ابيع تليفوني اصلا..فانا هاكون متاح اونلاين لحد بالليل..لو حد عنده فرصة شغل وسفر ليا ومش معاه رقمي ياريت يجيبه من أي حد”.

وشدد “إدريس” على إنه لا يحتاج “طبطبة” من أحد، وأن كل ما يريده فرصة عمل تجعله يعيش هو وأولاده حياة كريمة.

وأختتم شريف إدريس حديثه قائلا: “هاين عليا أقوم أرمي نفسي من البلكونة بعد ماوصلت أني اكتب البوست ده”.