أحمد العوضي يرد على تأخر سفره مع ياسمين عبد العزيز إلى سويسرا
محمد هيثم
علق الفنان أحمد العوضي، على الجدل الذي أُثير حول تأخر سفره مع زوجته الفنانة ياسمين عبد العزيز، إلى سويسرا لإجراء عملية عاجلة.
قال “العوضي” خلال لقائه في برنامج “معكم منى الشاذلي“، اليوم الخميس، المذاع على قناة “cbc” وتقدمه الإعلامية منى الشاذلي، إنه عندما طلبت ياسمين السفر للاطمئنان على حالتها الصحية لم يشغل تفكيرهما في ذلك الوقت ماذا ستقول الناس.
نرشح لك: أحمد العوضي: كنت محطم خلال تعب ياسمين
تابع: “كان فيه جرعة لقاح لسه مخدتهاش، وإحنا مسافرين بلد بره مصر مش هخبط على السفارة وأقولهم أنا مشهور ومراتي مشهورة إحنا مش مسافرين المعمورة نصيف”.
أضاف: “في إجراءات لازم تمشي، وهي كان معاها الفيزا ومفيش وقت أفكر الناس هتقول إيه، إحنا في عرض يوم”.
واصل: “إحنا مش بنزايد على بعض في حاجة، الموجود هيبقي معاها عشان نعدي المرحلة دي، ومهتمتش للكلام اللي اتقال ما دام هي عارفة لأنها أهم حاجة عندي”.
أردف: “أنا خدت كلام الناس بحسن نية، اللي هو سافر معاها ومسافرتش ليه؟ ده حب، وقولت يمكن عشان الناس متعلقة بينا أوي، وممكن يكونوا ميعرفوش التفاصيل اللي أنا قولتها”.
كانت الفنانة ياسمين عبد العزيز، كشفت عن التفاصيل الحقيقية لأزمة مرضها الأخيرة، والخطأ الطبي الذي تعرضت له.
قالت “ياسمين” خلال لقائها مع برنامج “معكم” مع الإعلامية منى الشاذلي، اليوم الأربعاء عبر شاشة “cbc”، إنها تعاني من مرض بطانة الرحم المهاجرة “chocolate cyst” منذ عمر 16 عام، معلقة: “أنا متعودة بعمل عملية معينة من وأنا عندي 16 سنة لأن عندي (chocolate cyst)، روحت للدكتور وهعمل العملية عادي بعد مسلسلي الأخير، اللي مشوفتش بعده خير من كورونا لتعب.. وأنا مش بحب أشتكي أصلا”.
أضافت: “المهم إن العملية كانت هتخلص بعد ساعتين ومعايا أحمد وبنتي وصاحبتي بس، طلعت منها فيه ألم رهيب وبصرخ لأول مرة وبقولهم أنا بموت، وباخد مسكنات ومفيش فايدة.. مرة واحدة لقيتهم بيقولوا لو معملتش عملية كمان ساعة هموت، طلع إن قولوني اتخرم وجالي تسمم في الدم، الدكتور كان داخل العملية وعارف إني هموت”.
أردفت: “وأنا داخلة العملية قولت لأخويا الكبير خلي بالك من ياسمين وسيف، لأني كنت حاسة إني مش هطلع.. وطلعت من العملية على العناية المركزة كانت الخراطيم والحقن في كل حتة في جسمي، اللي بيدخلوا عليا كانوا بيشوفوني بموت والدكاترة بيقولوا هي ماشية اليوم بيومه واللي بيدخل على الجهاز اللي أنا عليه ما بيطلعش.. جالي وقت قولتلهم أنا مش قادرة أكمل شيلوا كل حاجة أنا خلاص هبقى مرتاحة لو روحت لربنا”.