أحمد السعدني: "كل ما بكبر بعرف قيمة أبويا أكتر"
محمد هيثم
قال الفنان أحمد السعدني، إن حصره في فكرة إن والده الفنان الكبير صلاح السعدني، كانت تزعجه في صغره، ولكن مع الوقت أدركت قيمة والده.
تابع “السعدني” خلال لقاء جمعه بالفنان أحمد رزق، مساء الاثنين، في برنامج “بصراحه مع“: “فكرة إني ابن صلاح السعدني كانت مضيقاني وأنا صغير، وأنا عندي 5 أو 6 سنين مكنتش فاهم، بس كان في شيء مزعج، كنت لما أروح أي حتة، الناس تقولي ابن صلاح السعدني أهو، أبوك ممثل، كنت بتزف” .
نرشح لك: محمد محمود عبد العزيز ينشر صورة نادرة من كواليس فيلم “الكيت كات”
واصل: “الموضوع وأنا صغير كان مضايقني، وكل ما كنت بكبر كنت بفهم أبويا وأعرف قيمته أكثر، لأنه وأنا صغير كان بيتكلم باللغة العربية كتير أوي، وهو عنده ميكس بين اللغة العربية، والعامية ولغة ولاد البلد، هو الوحيد اللي بيعرف يعملها، كنت بستغرب، يا عم ما تتكلم زينا عادي”.
أضاف: “من وأنا صغير بحب التمثيل، بس استحالة إني اشتغل ممثل، عشان كده أنا دخلت تجارة، لأني كنت شايف التمثيل شغلانة مش مضمونة، بس حاليا أنا بعمل حاجة أنا بحبها وبتبسط وأنا موجود في لوكيشن من وأنا صغير، بس مكنش في دماغي إني هطلع ممثل، مكنتش حاسس بالمسؤلية أن في نقاد وفي تاريخ، ونفسي أرجع تاني خفيف مبقاش حامل الهم وأنا بدور على دور”.
أوضح: “والدي كان شايف فيا حاجة، أنا مكنتش حاسسها أوي، كنت حاسس إني هبقي ضايع، أنا كنت حابب الموضوع، وأقعد في البيت أمثل قدام المرايا، بس كنت خايف، وأبويا قالي أنا شايف فيك حاجة، مع الوقت كنت بفهمه، ربنا يديله الصحة”.
