أستاذ فيروسات يكشف علاقة لقاح كورونا بالحمل وخصوبة الرجال

بسملة سعودي
علاقة لقاح كورونا بالحمل
رد الدكتور إسلام حافظ الباحث في علم الڤيروسات بجامعة ميشجان الأمريكية، على الشائعات المتداولة بخصوص لقاح ڤيروس كورونا وزرع شريحة تجسس أثناء الحصول على اللقاح.

قال “حافظ”، أثناء لقائه ببرنامج “صباح الخير يا مصر“، على شاشة القناة الأولى، مع الإعلامي حسام حداد والإعلامية أميرة العقدة ” لو اشتريت جهاز (سمارت فون) وحد عايز يتابعك هيعرف يعمل كدة مش محتاج يحطها في التطعيم”.

نرشح لك: أستاذ مناعة: أعراض فيروس “RSV” الجديد تشبه كورونا


تابع في نفس السياق: “تاني حاجة الشريحة اللي موجودة في التليفون، أو أي شريحة في الدنيا بتحتاج لطاقة.. لو أنا حطيت شريحة في كتفي هشحنها منين، إشاعة ملهاش أي أساس من الصحة”.

وعن شائعة حدوث أمراض بعد الحصول على اللقاح قال: ” التطعيم بيحمي ضد المرض فهو نسخة شبيهة بالڤيروس المسبب للمرض ولكن معندهاش الوسائل اللي تخليها تعمل مشكلة مرضية في الجسم، كل اللي بتعمله إنها بتنبه الدفاعات المناعية داخل الجسم عشان يكونوا مستعدين لو تعرضنا للإصابة”.

تحدث أيضا عن شائعة حدوث عقم للرجال نتيجة اللقاح موضحا: “مفيش أي علاقة تماماً بين اللقاح ووظائف الخصوبة، كذلك التطعيم بيحمي السيدات الحوامل لأنه اتضح لنا إن الحمل نفسه عامل من عوامل الخطورة، الحوامل بتحدث عندهم مضاعفات أشد زي فقد الجنين أو التسمم لو جالهم الڤيروس”.

تابع: “دلوقتي كل الدول بتتجه إنهم يوفروا التطعيمات للحوامل عشان يتفادوا المشكلة دي، قبل الحمل أو أثناء الحمل، عمره ما اترفض في أمريكا”.

علاقة لقاح كورونا بالحمل