إعلام لايت

مؤلف “زهايمر” يكشف حقيقة مرض سعيد صالح بـ آلزهايمر خلال الفيلم

ياسمين شهاب
 سعيد صالح

كشف المؤلف نادر صلاح الدين، حقيقة إصابة الفنان الراحل سعيد صالح بمرض الزهايمر خلال مشاركته في فيلم “زهايمر”.

وكتب “صلاح الدين” عبر حسابه الشخصي بموقع التواصل الاجتماعي “فيسبوك”: “بقالي كام يوم بشوف بوستات عن مشهد عادل إمام وسعيد صالح في فيلم زهايمر والحقيقة الفيلم ده بالذات ليه معزة خاصة جدا عندي (بما إني مؤلف الفيلم مثلا)، والمشهد ده بالذات برضو ليه معزة أكتر، بما إنه جمع عملاقين وصديقين في مشهد واحد”.

نرشح لك: يتم التحضير له حاليا.. أبرز المعلومات عن فيلم سعيد صالح

أضاف: “الكلام اللي داير طبعا عجيب، وكله بيتكلم على إن سعيد صالح الله يرحمه كان وصل لمرحلة زهايمر (كمريض).. وده محصلش.. الراجل كان ساعتها زي الفل وواعي جدا.. وأنا حضرت كل اللقاءات التحضيرية وكل أيام التصوير، ثانيا وده منتشر برضو.. إنه مكنش بيحفظ وإنه ارتجل المشهد كله بكلام مش مكتوب بس مناسب للفيلم”. 

تابع: “طيب ما تراجع كلامه كده وشوف هو مرتبط بالشغل اللي قبله ولا لأ.. طب هو ارتجل التبول اللاإرادي ولا ده حصل ازاي طيب، أولا شخصية سعيد صالح هي الشخصية الوحيدة في الفيلم اللي عندها زهايمر.. وشخصية محمود كانت كأنها واقفة قدام مراية بتشوف مستقبلها اللي المجتمع عاوزها توصل ليه.. وبناء عليه كان فيه التالي:
– ذكريات الحرب (٧٣) والنصر والإنجاز العظيم لما عبروا سوا.
– شاهد على أعظم أحداث مصر وزعماءها لما ذكر السادات والأحداث المصاحبة- وأخيرا علاقته بأبناءه بكل تفاصيلها اللي اتكلم عليها في المشهد
هو ده المستقبل اللي كان منتظر شخصية محمود واللي أولاده عاوزين يوصلوه ليه.. علشان كده كان محمود في آخر المشهد من ورا سور والدموع في عنيه.. وكأنه مسجون جوة كل الهموم والظروف اللى حواليه.. هو مكنش بيعيط على صاحبه قد ما كان بيعيط على نفسه، مش هتكلم في تفاصيل أكتر من كده في المشهد علشان مطولش.. لكن كل ده لازم يكون مكتوب وإلا المسألة تختل والموضوع يبوظ، طبعا مش عيب فيفى حق المؤلف إن الفنان يرتجل.. وبرضو مش عيب في حق الممثل إنه يلتزم بالحوار العيب في فبركة الأخبار”.

واختتم حديثه قائلًا: “معلومة أخيرة عادل إمام ربنا يديله الصحة من أكتر الفنانين التزاما بالمكتوب.. وعنده إصرار شديد على ده لأقصى حد.. ومكنش بيسمح بزيادات إلا المتفق عليها في البروفات ما قبل التصوير، أرجوا من الناس تبطل هري لمجرد أنهم يكتبوا خبر أو يجروا ورا تريند، على فكرة أنا مش من الناس اللى بتحب تتصور، علشان كده ماليش صور كتير مع الفنانين اللي اشتغلت معاهم.. لكن بالصدفة دي الصورة الوحيدة اللي ليا في أثناء تصوير الفيلم، وبالصدفة هي في يوم تصوير المشهد، وبالصدفة أثناء مراجعة المشهد مع الأستاذين”.

يذكر أن فيلم “زهايمر” بطولة عادل إمام، فتحي عبد الوهاب، أحمد رزق، رانيا يوسف، نيللي كريم، إيمان السيد، ضياء الميرغني، محمد الصاوي، أحمد راتب، لطفي لبيب، إسعاد يونس، سعيد صالح، يوسف عيد، ياسر علي ماهر، ومن تأليف نادر صلاح الدين، وإخراج عمرو عرفة، وتم عرضه لأول مرة 2010.

كاتب

إعلام دوت كوم صوت الميديا العربية

أنت تستخدم إضافة Adblock

برجاء دعمنا عن طريق تعطيل إضافة Adblock