منتج فيلم "مش أنا": تامر حسني خصم من أجره لإضافته لـ حلا شيحة

صرح المنتج أحمد دسوقي، منتج فيلم “مش أنا”، أن موقف الفنانة حلا شيحة وتبرأها من الفيلم هو موقف لا يعقل ومرفوض تماما بالنسبة له.

كتب “دسوقي” عبر حسابه على “فيسبوك”: “كل اللي طلبته حلا تامر نفذه وزيادة ومكانش ليها أي طلبات بخصوص الكليب وتامر وقف في ضهرها وصمم يشيل كل اللي طلبته وعارض كل جهات الإنتاج عشان كان في خطورة على درامة الفيلم وتحملها تامر على عاتقه، وفتح الفيلم تاني مع المخرجة ومعايا شخصيا وبقينا بنشيل وبنحاول نحل الدراما بطريقة تانية مرهقة ومتعبة جدا”.

نرشح لك: “الشجعان اللي زيك بيراجعوا نفسهم”… رسالة معز مسعود لـ حلا شيحة

أضاف: “تامر عشان خاطر إرضاء حلا فضل قاعد في المونتاچ أسبوع كامل بيحل أضرار حذف المشاهد اللي طلبتها حلا عشان السياق الدرامي ميتأثرش بالسلب، والحقيقة إن كل جهة الإنتاج كانوا رافضين الحذف لإن دا شغل وكل حد أخد أجره عليه ومينفعش نبوظ فيلم بيتصور في سنتين وبيتحضر في سنة وفيه نجوم كبار عشان أستاذة حلا وصلت فجأة للسلام النفسي مع نفسها”.

أردف: “وهل من الصح إنها تدي نفسها الحق أنها تتهم وتشكك في النوايا والعقائد الدينية لناس وقفوا جنبها ده كلام لا يعقل ومرفوض تماما، وأنا مصدوم من تصريحات حلا تحديدا في حق الراجل الوحيد اللي كان في ضهرها وكمان حارب عشان يجيبلها أجر كبير جدا عشان يرفع من روحها المعنوية بعد ما طلبت منه يساعدها عشان ترجع في السينما بقوة”.

اختتم: “وللعلم كلمة حق قدام ربنا في حق الراجل دا عشان أجرها المادي يكبر تامر خصم من أجره الشخصي عشان يتحط عند حلا، دا غير إنها مكانتش بترد علينا كلنا قبل طرح الفيلم نهائي، كان ممكن يا حلا تتكلمي معانا كلنا أو تيجي تشوفي الفيلم قبل نزوله ونحل كل شيء بمنتهى الود والاحترام معرفش ليه عملتي كدا وكلنا كنا جمبك؟”.

منتج فيلم مش أنا

كانت الفنانة حلا شيحة هاجمت صباح أمس الخميس فيديو كليب “بحبك” الذي طرحه الفنان تامر حسني وتظهر فيه بمشاهد من فيلمهما الجديد “مش أنا” مؤكدة على أنها فوجئت بطرح الكليب رغم وعد تامر لها وتأكيده احترام رغبتها.

وكتبت حلا عبر حسابها على إنستجرام تقول: “أنا اتفاجئت جدا ًبنزول كليب يجمع فيه مشاهد متفرقة من الفيلم و في ايام ذي الحجة ايام مباركة و خصوصاً بعد اخر بوست نزلته و وضحت فيه انا ايه ..و اتفاجئت اكتر خصوصا ًبعد وعد تامر حسني ليا وتأكيده انه حيحترم رغبتي و بعض الطلبات اللي طلبتها منه بكل احترام وود الصيف اللي فات و اكدلي انه حيحترم رغبتي ..احنا يمكن نجحنا بمقايس الدنيا بس صدقوني بمقايس ربنا احنا لم و لن ننجح، انا عارفة و متاكدة ان زملائي جواهم خير بس للاسف فتنة الشهرة و النجاح مش بتخلينا نشوف ونقيس الامور صح”.

#حلا_شيحة بين الزواج والحجاب والتمثيل.. لماذا تبرأت من فيلم #تامر_حسني؟!