ابنة سعيد صالح: بابا كان ممتن لأفلام المقاولات

شاركت هند، ابنة الفنان الكبير الراحل سعيد صالح الجمهور بمنشور استعادت من خلاله ذكريات والدها مع المسرح، والأعمال التي أنتجها لنفسه.

طرحت “صالح المنشور عبر حسابها الشخصي على موقع “فيس بوك” وكتبت فيه الآتي: “بما إن بابا الله يرحمه يعتبر من ترندات العيد، افتكرت حبه وعشقه وتقديسه للمسرح، كان كل ليلة عرض بيروح المسرح بدري يقعد على خشبة المسرح لوحده وما يتكلمش مع حد، ولما كنت أسأله يقولى باخد على المكان والمكان بياخد عليا، كان كل ليلة بيبقى خايف من رد فعل الجمهور كأنها أول ليلة عرض”.

نرشح لك: الحكومة تنفي صحة الرسائل التحذيرية المتداولة عن لقاح كورونا

تابعت: “بعد العيال كبرت بابا حب يعمل مسرح يقول فيه رسالة أو ينتقد نظام أو يعبر عن اللي جوة سعيد صالح براحته، وطبعا آراء بابا كانت دايما بتسبب له مشاكل، حبه الكبير للمنتج سمير خفاجي -أبوه الروحي- خلاه يقرر يسيب فرقة الفنانين المتحدين وينتج مسرح لنفسه.. عشان ميسببش لسمير خفاجي أي مشكلة، بالبلدي يعني ما يجيبلوش وجع دماغ، عشان ينتج مسرح يقول فيه رأيه اضطر يعمل أفلام سميت في فترة التمانينات والتسعينات بأفلام المقاولات
وقتها هو مكانش راضي عنها أبدا لأنها مش بقوة سلام يا صاحبي والمشبوه وأشياء ضد القانون مثلا،بس كان مضطر عشان يصرف على المسرح”.

أردفت: “وبعد نجاح المسرحيات اللي عملها ومنهم كعبلون واللي لحد النهاردة الناس فاكراها وبتردد أغانيها، وبعد ما صوته ورأيه وصلوا، قالي انه كان غلطان في الحكم على الأفلام دي، وإن لولا الأفلام دي مكانش عرف يقول رأيه ويقدم مسرحه اللي بيعبر عن شخصه، وفضل لحد ما توفى ممتن لأفلام المقاولات”.

اختتمت: “الخلاصة يعنى عشان أنا رغيت كتير، مافيش عمل سئ هيمحي تاريخ نجم أبدا، نهزر ونضحك ونتريق وتاخد وقتها وتمشي، لكن ماندبحش الفنانين عشان عمل طلع سئ، عادي على فكرة”.