عمرو أديب عن الزحام حول محمد صلاح: منظر محرج وخطر

علق الإعلامي عمرو أديب على مشهد الزحام حول محمد صلاح لاعب منتخب مصر ونادي ليفربول الإنجليزي، عقب انتهاء مباراة مصر وجزر القمر، التي انتهت بفوز منتخب مصر برباعية نظيفة، في لقاء الجولة السادسة بتصفيات أمم أفريقيا 2022، المقرر إقامتها في الكاميرون.

قال “أديب” خلال برنامج “الحكاية” المذاع على شاشة mbc مصر: “بعد الماتش حصل موقف مؤلم، يعني بصراحة ميحصلش في مباراة خماسي ملعوبة في حارة شعبية”.

نرشح لك: لميس الحديدي: نجحنا في إخلاء المجرى الملاحي الأهم في العالم

تابع: “نزل ناس متعرفش منين، وجري وبيشدوه طبعا كلهم مش لابسين كمامات ولا حاجة، طبعا مش هيلبسوا كمامات لأن عايزين يتصوروا سيلفي، الراجل لقى نفسه في موقف خطر جدا، ولا حد أنقذه ولا حد عمله حاجة”.

استكمل: “الناس كلها ملمومة عليه، الموضوع ده لازم يتعمل فيه تحقيق، لا فيه أمن، ومين اللي سمح إن الجمهور ده يبقى موجود، والراجل بيتشد من أيده يمين وشمال منظر محرج وخطر، وده راجل صحته مهمة وكل اللاعيبة طبعا صحتها مهمة، إنما الراجل خايف على نفسه، وكلهم طيب سيلفي يا كابتن، طيب بوسة”.

أردف: “ده فيه صورة لواحد مُصر يبوسه، ده كلام؟ إحنا فين؟ يعني ده يحصل في مباراة دولية؟ فين اتحاد الكرة؟ وسيلفي وبتاع، مين دول؟ مين العيال دي؟”.

أشار إلى أن المواقع الإنجليزية تداولت المشهد، مضيفا: “لولا إن واحد من إداريين المنتخب نزل شده وخدوا على جنب، مين دول؟ إزاي المنظر ده يحصل؟”.