ريهام سعيد تعتذر للجمهور: سامحوني مش هغلط تاني
علقت الإعلامية ريهام سعيد على قرار المجلس الأعلى للإعلام بعودة برنامجها “صبايا الخير”، وذلك بعد قرار إيقافه بسبب حلقة صيد الثعالب التي أثارت الجدل، بشرط أن تعتذر في أولى حلقات البرنامج بعد عودة البث.
كتبت ريهام عبر حسابها على إنستجرام: “على قد ما زعلت إني اتهاجمت واتجرحت كتير فرحت أوي أن ناس كتير بقت رحيمة بالحيوانات حتى لو مفترسة وخطر على البني آدم، أنا بعتذر على أي مشهد في إساءة لأي حد وخصوصا الناس المهتمه بالرفق بالحيوان، بعتذر إني تسببت في أي ألم لأي حد فيكم لكن لازم تكونوا متأكدين أنا اشتغلت واجتهدت وتعبت لمدة ١٨ سنة وأكيد مش محتاجة أي شهرة ولا مشاهدة، الهدف الوحيد هو تقديم محتوى محترم صادق ومفيد”.
نرشح لك: الأعلى للإعلام يسمح بعودة “صبايا الخير” بشرط اعتذار ريهام سعيد
أضافت: “كنت عايزة أسلط الضوء على مهنة الصيد اللي موجودة في كل أنحاء العالم بمميزاتها وعيوبها حبيت أقدم الحقيقة وأزود معلومة جديدة لأن هي دي نيتي بس أنا مش بشتغل في مهنة الصيد ولا بمارسها لكن هي موجودة، أي اتهامات انا هرد عليها الحلقة الجاية لكن المهم دلوقتي أن محدش يزعل مني لأن أكيد كل الي اتقال ده مش حقيقة، أنا عايزة أعيش في سلام وكفاية مشاكل، نفسي اللي بيهاجموا وعمرهم ما اتفرجوا على البرنامج يبتدوا يتابعوا يمكن تشوفوا أد إيه بنتعب وأد إيه حريصين أن إحنا نقدم أحسن حاجة”.
تابعت: “أنا اسفه مرة تانية والمرة اللي جاية هحط في الاعتبار أن ساعات الحقيقة ممكن تجرح بس طلب اخير لما تلاقوا غلط انصحوا وصلحوا وماتجرحوش لان اكيد اللي رحيم بالحيوان هيكون اكيد رحيم بالبني آدم اللي هو ربنا حطه في أعلى مرتبة. أنا إنسانة وأكيد الحكم عليه انا وعيلتي بالاعدام كل شويه مش عدل خصوصا ان طول الوقت في سوء تفاهم ولكن بيكبر نتيجه المشاهده العاليه . بتعرض لهجوم واساءه رهيبه من غير ما حد حتي يعمل اعتبار لأولادي أو أمي. من دلوقتي لازم نفهم قد ايه احنا بنتشاف ولازم نكون قد المسؤليه وحتي لو لينا اعداء متربصين . امشي عدل يحتار عدوك فيك . وعد مش هانغلط تاني سامحوني”.
View this post on Instagram
كان المجلس الأعلى لتنظيم الإعلام قد أعلن انتهاء التحقيقات بشأن برنامج “صبايا الخير”، موضحا أنه لا مانع لدى من إعادة بث البرنامج، وذلك في ضوء التعهد المقدم من مقدمة البرنامج ريهام سعيد بالاعتذار للجمهور في أولى حلقات البرنامج بعد إعادة البث عن ما تم التحقيق بشأنه.